Փաշինյանը, ամենայն հավանականությամբ, չի ցանկացել հասկանալ իր գեներալներին. ամերիկացին զարմացած է` ինչու Երևանը «Իսկանդեր»-ով չի հարվածել «Բայրաքթարների» բազային
Ամերիկացի ռազմական վերլուծաբան Ռոբ Լին, վերլուծելով Հայաստանում ստեղծված իրավիճակը, կարծիք է հայտնել, որ ընդդիմության քննադատությունը՝ ուղղված Նիկոլ Փաշինյանի հասցեին, զուրկ չէ տրամաբանությունից:
Վերջինիս մեկնաբանությունը ներկայացնում է Свободная Пресса-ն՝ հայտնելով, որ վերլուծաբանը զարմացած է, որ Հայաստանն Ադրբեջանին չի պատասխանել «Իսկանդեր» համալրից հասցված հարվածներով՝ ուղղված թուրքական «Բայրաքթար» անօդաչուների բազաներին, որոնք ադրբեջանական զորքերը կիրառում էին մեծ հաջողությամբ:
«Հետախուզությունն իմացել է, որտեղ են գտնվում օպերատորները: Եվ ճշգրիտ հարվածը դրանց ուղղությամբ երկար ժամանակով կանշարժացներ մահացու անօդաչուները: Նման կադրեր (անօդաչուները կառավարող օպերատորները-Խմբ.) արագ պատրաստելն անհնար է»,- նշել է փորձագետը:
Ռոբ Լին գրում է, որ հայերը սկսել են բուռն կերպով քննադատել «Իսկանդերի» կիրառումը միայն այն ժամանակ, երբ ադրբեջանցիները մոտեցել էին Շուշիին: «Դա վերջին փորձն է եղել, սակայն մոտ թիրախ խոցելու համար նման հեռահար համակարգ օգտագործելն անարդյունավետ կլիներ»,- նշում է փորձագետը՝ հավելելով, որ Փաշինյանը պարզապես չի հասկացել կամ, ամենայն հավանականությամբ, չի ցանկացել հասկանալ իր գեներալներին, որոնք նրան հայտնում էին իրենց տեսակետը:
Այնուամենայնիվ, քաղաքական ղեկավարության և զինվորական վերնախամի միջև հարաբերություններն այսօր խոր ճգնաժամ են ապրում, ինչը ևս մեկ անգամ վկայում է նաև պատերազմի ժամանակահատվածում եղած խիստ տարաձայնությունների մասին: Ակնհայտ է, որ կառավարության և Գլխավոր շտաբի նպատակները չեն համընկել և չեն համընկնում: Արդյունքում Փաշինյանն աշխատանքից հեռացնում է հենց այն գեներալներին, որոնք հանդես են գալիս բանակի արագ վերականգնման օգտին»,- աղբյուրը մեջբերում է ամերիկացի վերլուծաբանին:
Նշվում է, որ ամերիկացի դիտորդներն ուշադրություն են հրավիրել այն հանգամանքի վրա, որ Հայաստանի վարչապետը միտումնավոր է իրեն պահում որպես զուտ քաղաքացիական անձ, որն, իբրև, չի հասկանում ռազմական տեխնիկայից: «Նորագույն «Իսկանդեր»-ների վերաբերյալ, որոնք կիրառելու մասին իրեն, անկասկած, ամեն օր ասում էին 2020 թվականի աշնանը, նա բերանից թռցրել է. «Չեն պայթել կամ գուցե պայթել են 10 տոկոսով»»,- նկատում է աղբյուրը:
Ինչպես պարբերականը ներկայացնում է, այդ թեմային անդրադարձել է նաև ամերիկացի վերլուծաբան Ջոշուա Կուչերան՝ ուշադրություն հրավիրելով հետևյալ փաստին. երբ լրագրողը ճնշում է գործադրել նրա վրա՝ հարցնելով «ճիշտ է դա արդյո՞ք», Փաշինյանը հանելուկային պատասխան է տվել. «Չգիտեմ… Գուցե դա 80-ականների զենք է եղել»:
«Այնուամենայնիվ, հնարքն աշխատեց. Սպիտակ տունը ստացավ իրեն անհրաժեշտ ազդակը, Կրեմլը կուլ տվեց վիրավորանքը: Մոսկվան գործնականում «լռեց», թեև ռուսական զենքի արտահանումը կարևորագույն բիզնեսն է երկրի համար, իսկ ռուսական զենքի համբավը ոչ միայն պետական քաղաքականության հարց է, այլ նաև զսպող գործոն ՆԱՏՕ-ի համար», - նշվում է հոդվածում:
«Նիկոլ Փաշինյանը, ըստ էության, քննադատական գնահատական տալով ռուսական զենքին, զանգահարել է Վլադիմիր Պուտինին, ասես ոչինչ չի պատահել` շարունակելով խաղալ «հասարակ քաղաքացիական անձի» դերը: Սեփական սխալի նկատմամբ արձագանքն այլ պետք է լինի՝ հրապարակավ ներողություն հայցելը, որը չի եղել»,- եզրափակում է պարբերականը: