Հերոս Կիրանցը նշեց գյուղի օրը (Լուսանկարներ)

Այսօր՝ օգոստոսի 1-ին Տավուշի մարզի սահմանամերձ Կիրանց գյուղում ավանդույթի համաձայն նշվեց գյուղի օրը: Ժամը 11-ին ծաղիկներ դրվեցին ազատամարտիկների հիշատակին կառուցված հուշահամալիրում:

Հավաքվածներին ողջույնի խոսքով դիմեց ծնունդով կիրանցեցի, հայտնի օդաչու-փորձարկող, գեներալ-գնդապետ Վալենտին Նազարյանը: Նա շեշտեց, որ թեեւ Կիրանցը փոքր, բայց իսկական հերոս գյուղ է: «Ոչ առաջին հանրապետության, ոչ էլ երրորդ հանրապետության տարիներին կիրանցեցիները թույլ չեն տվել թշնամուն մոտենալ գյուղի տարածքին: Կիրանցը լավ օրինակ է ամբողջ ժողովրդի համար»,- նշեց գեներալ-գնդապետը, որն ակտիվ մասնակցություն է ունեցել գյուղի ինքնապաշտպանության կազմակերպմանը, ինչպես նաեւ Շուշիի ազատագրմանը, կազմակերպելով օդուժի գործողությունները: Նա նաեւ ընդգծեց, որ իր հաջողությունների համար պարտական է հենց ծննդավայր Կիրանցին:

Ելույթ ունեցան նաեւ գյուղի պատմության ուսուցիչ Նվեր Սիմոնյանը, ինչպես նաեւ գյուղապետ Կամո Շահինյանը: Նա հատուկ ընդգծեց, որ գյուղը թեեւ սահմանամերձ է, բայց Կիրանցից երիտասարդները չեն հեռանում, եւ հույս հայտնեց, որ կառավարությունը վերջապես կաջակցի նորաստեղծ ընտանիքներին բնակարանով ապահովելու կարեւոր գործին:

Հավաքվածներին ողջունեց նաեւ մարզպետարանի տարածքային կառավարման վարչության պետ Մ. Մխիթարյանը, որը եւս հիշեցրեց գյուղի հերոսական անցյալի մասին, նշելով, որ այս գյուղը արժանի է ամենալուրջ աջակցության:

Ընդգծենք, որ Կիրանցը ունենալով հազիվ յոթանասուն տնտեսություն, իննսունականների սկզբներին տվել է 16 զոհ, իսկ գյուղի տղաներից կազմված ջոկատի հերոսական ջանքերի շնորհիվ ազատագրվել է մի քանի բնակավայր, որի շնորհիվ այսօր Կիրանցը համեմատաբար ապահով է եւ խաղաղ:

Գյուղի հերոսական անցյալի մասին մանրամասներ կարող եք իմանալ այստեղից:

Երեխաները եւ պատանիները եւս հարգանքի տուրք մատուցեցին գյուղի հերոսներին:

Top-News.am