Գեյթսը կարծում է, որ սոցիալական ցանցերը պետք է թույլ տան Թրամփին վերադառնալ

Microsoft-ի հիմնադիր Բիլ Գեյթսը կարծում է, որ սոցիալական ցանցերը պետք է թույլ տան նախկին նախագահ Դոնալդ Թրամփին վերադառնալ այն բանից հետո, երբ նրա հաշիվները փակվել էին Կապիտոլիումի անկարգությունների հետ կապված:

«Կարծում եմ, որ ինչ-որ պահի նրան, հավանաբար, թույլ կտան վերադառնալ եւ, հավանաբար, պետք է թույլ տալ վերադառնալ»,- CNBC-ին տված հարցազրույցում ասել է Գեյթսը՝ պատասխանելով այն հարցին, թե արդյոք ինքը թույլ կտար նախկին նախագահին վերադառնալ սոցիալական ցանցեր, եթե Facebook-ի պաշտոնական դեմքը լիներ:

Նախորդ ամիս Թրամփը արգելափակվել էր Twitter-ում՝ նախկին նախագահի կողմնակիցների կողմից հունվարի 6-ին Կապիտոլիումը գրոհելու փորձից հետո: Twitter-ը հայտարարել է, որ նախկին նախագահի թվիթները «բռնության հետագա հրահրման վտանգ են ներկայացնում»:

Գեյթսը կանխատեսել է, որ սոցիալական ցանցերի հսկաները «կգտնեն նրան վերադարձնելու ձեւը», չնայած նրա կոնտենտը «շատ դեպքերում կարող է նշվել որպես կեղծ»:

Twitter-ը, Facebook-ը եւ այլ հարթակներ բազմիցս պիտակներ եւ հաղորդագրություններ են ավելացրել Թրամփի հետընտրական հաղորդագրություններին՝ նշելով դրանք որպես մոլորության մեջ գցող: Մի քանի գրառումներ նույնպես ընդմիշտ ջնջվել կամ արգելափակվել են:

Ընդ որում, Գեյթսը կարծում է, որ «մարդկանց հետաքրքրությունը այն ամենի հանդեպ, ինչ ասում է Թրամփը, կարող է որոշակիորեն նվազել» առաջիկա տարիներին»: