Թուրքիան այժմ վերապրում է հանրապետության ստեղծումից ի վեր իր ամենածանր օրերը. ՄԱԿ-ի զեկույց

ՄԱԿ-ի մարդու իրավունքներին նվիրված հատուկ նիստի ընթացքում ընթերցվել է Թուրքիայում մարդու իրավունքների ու հիմնարար ազատությունների վիճակի մասին զեկույցը, ըստ որի ժամանակակից Թուրքիան այժմ վերապրում է հանրապետության ստեղծումից ի վեր իր ամենածանր օրերը։

Ինչպես գրում է թուրքական Dihaber գործակալությունը, ՄԱԿ-ի զեկույցը փաստում է, որ Թուրքիայում մարդու իրավունքների հետ կապված վիճակն ավելի վատ է, քան 1982թ.-ի նոր սահմանադրական փոփոխություններից առաջ առկա վիճակը։

Ըստ զեկույցի՝ Թուրքիայում այժմ ձերբակալված է 231, կալանավորված՝ 150-ից ավելի լրագրող, չեղարկվել է 778 լրագրողի հավատարմագիր։

Ամիսներ առաջ Եվրախորհրդի խորհրդարանական վեհաժողովը մամուլի ազատության վերաբերյալ պահանջներ է ներկայացրել Թուրքիային:

Եվրախորհրդի պատգամավորների դատին հանձնված զեկույցը, որն ընդունվել է 110 կողմ, 15 դեմ ձայների հարաբերակցությամբ, պահանջում է Թուրքիայից ազատ արձակել ահաբեկչական միջոցառումներին մասնակցելու մեղադրանքով ձերբակալված լրագրողներին, վերանայել Թուրքիայի քրեական օրենսգրքի «Թրքությունը վիրավորելու» մասին 301-րդ հոդվածը, ինչպես նաև «նախագահին վիրավորելու» մասին 229-րդ և «ժողովրդի մեջ ատելություն սերմանելու» մասին 216-րդ հոդվածները: Զեկույցը նաև կոչ է անում վերանայել համացանցի հրապարակումների վերաբերյալ մեղադրանքներն ու թուլացնել Թուրքիայի պետական հեռուստաալիքի նկատմամբ պետական վերահսկողությունը:

tert.am