Էրդողանն ընդդեմ օտարերկրյա լրագրողների

Թուրքիայի Բաթմանի նահանգում ձերբակալված ֆրանսիացի լրագրող - լուսանկարիչ Մաթիաս Դեպարդոնը, որն, ինչպես հայտնի է, կարտահանձնվի Ֆրանսիային, հայտնել է, որ իր հանդեպ կատարված անօրենություններով Թուրքիայի իշխանությունները ցանկացել են հատուկ ուղերձ հղել Թուրքիայի քրդաբնակ շրջաններում գործող թուրք և օտարերկրացի լրագրողներին։

«Կարծում եմ՝ նրանք ցանկանում էին հստակ ուղերձ փոխանցել հարավ-արևելյան շրջաններում դեպքերը լուսաբանող տեղացի և օտարերկրացի լրագրողներին», - ասել է լրագրողը։

Ինչպես գրում է թուրքական diken.com.tr կայքը, մեկ ամիս շարունակ Գազիանթեփի՝ Ներգաղթի հետ կապված հարցերի վարչությունում պահվող ֆրանսիացի լրագրողը նաև նշել է, որ այդ ամբողջ ընթացքում նրան չեն թույլատրել հանդիպել որևէ մեկի հետ։

Դեպարդոնը Թուրքիայի իշխանությունների կողմից մեղադրվում էր երկրում ահաբեկչական համարվող «Քուրդիստանի աշխատավորական կուսակցություն» խմբավորմանն աջակցություն ցույց տալու համար։