Կրակոցներ չեն եղել. Շիրակի մարզի դատախազը չցանկացավ նշել միջադեպի մասնակիցների անունները

Գյումրիի Թատերական հրապարակում հունիսի 8-ի երեկոյան տեղի ունեցած վիճաբանության ժամանակ կրակոցներ չեն եղել։ Այս մասին այսօր NEWS.am-ի հետ զրույցում հայտնեց Շիրակի մարզի դատախազ Կարեն Գաբրիելյանը։

«Տեղի է ունեցել միայն ծեծկռտուք։ Կրակոցներ ընդհանրապես չեն եղել»,- ասաց դատախազը։

Նա հայտնեց, որ այս պահի դրությամբ հարուցված է քրեական գործ ՀՀ քրեական օրենսգրքի 316 հոդվածի (Իշխանության ներկայացուցչի նկատմամբ բռնություն գործադրելը) եւ 258-ի (խուլիգանության) հատկանիշներով. «Իրականացվում են օպերատիվ-որոնողական աշխատանքներ՝ վիճաբանության մասնակցած անձանց հայտնաբերելու ուղղությամբ»,-ասաց նա:

Կարեն Գաբրիելյանը նաեւ նշեց, որ չի կարող հնչեցնել վիճաբանության մասնակցած անձանց անունները, քանի դեռ ոստիկանության կողմից իրականացվում են համապատասխան միջոցառումները։

Ավելի վաղ NEWS.am-ը հայտնել էր, որ Գյումրիի Թատերական հրապարակում հունիսի 8-ի երեկոյան տեղի է ունեցել վիճաբանություն ու ծեծկռտուք, հնչել են կրակոցներ: Aravot.am-ի փոխանցմամբ, թաղի բնակիչները ճանաչել են, որ վիճաբանողներից մեկը «Շիրակ» ԳԳՄ տնօրեն Սերգեյ Ամիրբեկյանի վարորդն է, մյուսը՝ գազի գրասենյակի նախկին աշխատակից Վարդան Եդիգարյանն է: Վերջինս Գյումրու ավագանու անդամ է, գազի գրասենյակի տեղամասի պետ է եղել, որին ազատել են աշխատանքից, իսկ ՀՀԿ-ական Սերգեյ Ամիրբեկյանի վարորդը ուժային կառույցներում տարբեր պաշտոններ զբաղեցրած Անդրանիկ Պողոսյանի՝ «Կոբալ Անդոյի» որդին է։ Վերջիններս սկսել են թունդ վիճաբանության մեջ մտնել հենց գազի գրասենյակում, որը տեղափոխվել ու շարունակվել է թատրոնի մոտ։

NEWS.am