«ԱՐԴԱՐՈՒԹՅՈՒՆ» կուսակցությունը խստիվ դատապարտում է Սամվել Բաբայանի ձերբակալությունը

«ԱՐԴԱՐՈՒԹՅՈՒՆ» կուսակցությունը եւ իր համախոհները խստիվ դատապարտում են ազգային հերոս Սամվել Բաբայանի ձերբակալության փաստը:

Մենք համոզված ենք, որ քաղաքական ենթատեքստ ունեցող նմանատիպ ներկայացումները խորապես ազդում են մեր երկրի հեղինակության վրա եւ հուսալքության են հասցնում ժողովրդին:
Չի կարելի կարճատեւ հարցերի լուծման համար արժեզրկել մեր ազգի արժեհամակարգը: Սամվել Բաբայանի նման անձինք, որոնք անչափ մեծ ներդրում ունեն մեր երկրի այսօրվա կայացման եւ անվտանգության գործում, չպետք է հալածվեն եւ անվանազրկվեն: Այդպիսի անիմաստ քայլերով մեր երկիրն անլուրջ տպավորություն է թողնում միջազգային քաղաքական ասպարեզում: Նման խիզախ եւ անվախ մարդիկ հանդիսանում են մեր երկրի անվտանգության եւ անկախության գրավականը: Ի՞նչ պետք է մտածեն այն զինվորները, որոնք ոգեշնչվել եւ հաղթել են թշնամուն՝ ուղղորդվելով Սամվել Բաբայան առաջնորդի եւ հրամանատարի կերպարով:
Ադրբեջանցիներին տարիներ շարունակ չհաջողվեց ընկճել եւ ոչնչացնել իրենց ոխերիմ թշնամուն՝ Սամվել Բաբայանին: Մի՞թե դա կանեն մեր իշխանությունները: Մի՞թե դա արդար կլինի: Ինչո՞ւ են մեր հերոսները հայտնվում բանտերում...
Հարգելի՛ հայրենակիցներ, մեզանից յուրաքանչյուրը ցանկացած պահի կարող է հայտնվել նմանատիպ մեղադրանքների դաշտում: Դա արդար չէ:
Պաշտպանելով մեր հերոսներին՝ պաշտպանում ենք մեզ:
Մտածեք այդ մասին...
«ԱՐԴԱՐՈՒԹՅՈՒՆ» կուսակցություն