Մենք լավ ճանաչում ենք միջազգային իրավունքը

Հայաստանի հետ բարեկամությունն արդեն 30 տարի է՝ սկսած 1988 թ. երկրաշարժից, իսկ հետագայում՝ 2003-ին, Շվեյցարիայի Ազգային խորհրդի կողմից Հայոց ցեղասպանությունը ճանաչվեց: Այսօր ՀՀ ԱԺ նախագահ Արա Բաբլոյանի հետ համատեղ ասուլիսում նման հայտարարություն արեց Շվեյցարիայի Համադաշնության Ազգային խորհրդի նախագահ Դոմինիկ դը Բյումանը: Նա շեշտեց՝ Հայաստան-Շվեյցարիա համագործակցության հաջորդ փուլը կլինի այն, որի սկիզբը դնում են այսօր:

«Իրականում, առաջին անգամ է, որ Շվեյցարիայի ԱԺ խորհրդի նմանատիպ պատվիրակություն է գալիս Հայաստան, սա նախորդ փուլերի կոնսոլիդացիան է: Մեր ճանապարհորդության ընթացքում տեսանք այն աշխատանքները, որոնք կատարվել են շվեյցարական «Համագործակցություն և զարգացում» կազմակերպության կողմից: Այսօր մենք պսակ ենք դրել Հայոց ցեղասպանության հուշարձանին և դրանով իսկ նոր սկիզբ ենք դնում մեր հարաբերություններին»,- ասաց նա:

Դոմինիկ դը Բյումանի խոսքով՝ Շվեյցարիայում համոզված են, որ ՀՀ բարօրությունն անցում է տնտեսական բարօրության միջոցով, ինչն, ըստ նրա, ամենակարևոր հիմքերից մեկն է: Շվեյցարիայի Համադաշնության Ազգային խորհրդի նախագահը շեշտեց, որ վերոնշյալ նպատակից ելնելով է, որ Շվեյցարիայում ստեղծվել ՀՀ-Շվեյցարիա առևտրատնտեսական պալատ:

«Հայաստան այցը մեզ համար նաև հնարավորություն է կոնկրետ աշխատանք իրականացնելու: Մենք ԱԺ նախագահի հետ երեկ Երևանի աղի գործարանի նոր մասնաշենքի բացմանը ներկա եղանք, ինչը ՀՀ-Շվեյցարիա-Գերմանիա համատեղ աշխատանքի արդյունքն է: Մենք նաև տեսնում ենք այլ ոլորտներ, որոնց զարգացումը ՀՀ կառավարության համար առաջնահերթ է՝ գյուղատնտեսություն, գինեգործություն և այլն»,- նշեց Դոմինիկ դը Բյումանը:

Նա նկատեց, որ ՀՀ-ի հարավում ամբարտակ կառուցելու համար Շվեյցարիան արդեն իսկ 12 մլն ներդրում է կատարել: Նա նաև շեշտեց, որ զարգացում կա ՀՀ-Շվեյցարիա առևտրաշրջանառության մեջ: «Մենք այսօր կարող ենք խոսել 2017 թվականին առևտրաարդյունաբերական զարգացման նիշերի մասին, քանի որ այդ թիվն առաջին անգամ 200 մլն-ն անցնում է: Մյուս ցուցանիշն այն է, որ 7 տոկոսով շրջանառությունն ավելացել է: Մենք համոզված ենք, որ ՀՀ-ի տնտեսական զարգացումը սահմանների բացմամբ կլինի՝ սա է ազատական տնտեսության զարգացման հիմքը, բայց շուկաների առկայությունն արդեն իսկ վկայում է սահմանների բաց լինելու մասին»:

Շվեյցարիայի Համադաշնության Ազգային խորհրդի նախագահը շեշտեց, որ իրենք չեն ուզում որևէ կերպ խառնվել ՀՀ-ի ներքին քաղաքականությանը, սակայն նկատեց, որ այլ հարց է դիվանագիտական ծառայությունը, որը կարող է մատուցել Շվեյցարիան:

«Մեր դիվանագիտությունը կարող է ծառայություններ մատուցել հատկապես միջազգային կազմակերպությունների հետ աշխատանքում՝ ԵԱՀԿ և այլն: Մենք լավ ճանաչում ենք միջազգային իրավունքը, մենք շատ լավ գիտենք, որ հավասարակշռություն կա ազգերի ինքնորոշման և տարածքային անձեռնմխելիության միջև: Հենց այդ բանակցային գաղափարն առաջ տանելով է, որ Շվեյցարիան միշտ կլինի Հայաստանի կողքին խաղաղ բանակցությունները շարունակելու համար»,- եզրափակեց Դոմինիկ դը Բյումանը: