Ինչու եւ ումից են վախենում հայերը 2

Օրեր առաջ անդրադարձել էինք այն խնդրին, որ հայ մարդը քաջաբար կանգնում է առաջին գծում, վտանգելով իր կյանքը, չվախենալով զոհվելուց, հաշմանդամ դառնալուց կամ գերի ընկնելուց, բայց ինչ որ տարօրինակ հիպնոզի տակ է ընկնում, եւ վախենում է թաղի խուժանից, գյուղապետից, համատիրության ղեկավարից: Վախենում է եւ չի համարձակվում քվեարկել իր նախընտրած կուսակցության կամ դաշինքի օգտին:

Եւ իսկապես, ինչի՞ց եւ ումի՞ց է վախենում հզոր գեներ ունեցող հայը: Ընտրություններից առաջ մենք անպայման պետք է ստանանք այս հարցի պատասխանը եւ ապացուցենք, որ վախենալու կարիք չկա, որ վախեցնողները միայն վախեցնում են, եւ ոչ ավելին, առաջնորդվելով սպառնալիքն ավելին է, քան նրա իրականացումը սկզբունքով:

Կրկնում ենք, աղքատ մարդը կորցնելու ոչինչ չունի, իսկ ունեւորի համար ամոթ է անգամ վախի մասին մտածելը: Գյուղապետը, քաղաքապետը, թաղի հեղինակությունը ձեզ ոչինչ չի կարող անել, եթե դուք չվախենաք: Նրանց միակ ուժը ձեր մեջ եղած վախն է:

Մեր առաջին հրապարակմանն արձագանքել են մեր ընթերցողների մի մասը եւ դրանց չենք կարող չանդրադառնալ:

Այսպես, շատերը համաձայն են, որ վախեցնում են, քանի որ վախի մեջ ապրողին հեշտ է կառավարել: Ստացվում է, որ ընդամենը պետք է չվախենալ: Առաջին քայլը ազատության ճանապարհին՝ չվախենալն է: Մի վախեցեք, ոչ ձեզ «Փարոսից» կզրկեն, ոչ ձեր տունը կխլեն, ոչ էլ հողամասը: Իսկ եթե ծեծից եք վախենում, ապա հիշեք, որ ծեծում են թույլին եւ անպաշտպանին:  

Ընթերցողներից ոմանց անհանգստացնում է, այսպես կոչված, թաղային հեղինակությունների գոյությունը: Հավատացեք, դրանք ազդում են միայն վախի մեջ գտնվող մարդկանց վրա: Նրանք չեն կարող ձեզ ստիպել քվեարկել ՀՀԿ-ի օգտին, եւ ոչ էլ կարող են իմանալ, թե ում օգտին եք քվեարկել:

Ձեր ընկերոջը,հարեւանին, ազգականին բացատրեք, որ որեւէ մեկից վախենալ պետք չէ, եւ որ ամենակարեւորն է՝ որեւէ մեկը չի կարող ձեզ ստիպել ցույց տալ, թե ում օգտին եք քվեարկել, ոչ էլ կարող են իմանալ այլ միջոցներով: 

Ոմանք նշում են, թե կարող են իրենց չենթարկվածի «գլխին սարքել»: Հավատացեք, մինչ օրս որեւէ մեկի «գլխին չեն սարքել» եւ չեն էլ կարող սարքել: Նրանք այդպես միայն վախեցնում են եւ վախի մթնոլորտ սարքում:

Եւս մեկ անգամ շեշտենք, որ ամոթ է, երբ հերոսը, որը պատրաստ է կյանքը զոհել հանուն հայրենիքի, վախենա թաղի խուժանից կամ «Փարոսից» դուրս մնալուց եւ քվեարկի ՀՀԿ-ի կամ իր թշվառ կյանքի շարունակման օգտին:

Հակոբ Ասատրյան

Այս թեմայով Կարող եք քվեարկել առանց ռեյտինգային թեկնածուին ձայն տալու (Տեսանյութ) Կարեն Կարապետյանը՝ ընդդեմ ռեյտինգային ընտրակարգի Ընտրողները չեն հասկանում, թե ինչ է ռեյտինգային ընտրակարգը Նրանք ձեզ զգուշացրել էին եղբայրասպան ռեյտինգային ընտրակարգի մասին ՀՀԿ-ականների կռիվը թեւածում է քաղաքից քաղաք