ՀՀԿ-ականների կռիվը թեւածում է քաղաքից քաղաք

Սերժ Սարգսյանի վարած քաղաքականությունը՝ ԱԺ ընտրությունների շրջանակներում միմյանց դեմ է հանել ՀՀԿ-ական պատգամավորության թեկնածուներին:

Ընդամենը մի քանի օր առաջ Արարատի մարզի Մասիս քաղաքում երկու ՀՀԿ-ականներ՝ Արայիկ Գրիգորյանը եւ Մուրադ Մուրադյանը հայտնվեցին բոլորի ուշադրության կենտրոնում: Նրանց սկանդալային վեճի պատճառը մեկը մյուսի տարածք մտնելն էր. Արայիկ Գրիգորյանը Մուրադ Մուրադյանի «տարածքում» նախընտրական շտաբ էր բացել: ՀՀԿ-ականների կռվախնձոր դարձած տարածքի կռվի հետեւանքով՝ մարմնական ծանր վնասվածքներ ստացավ նախընտրական շտաբի աշխատակիցներից մեկը:
Հանրապետականների այս «տուրուդմփոցը» դեռ չավարտված, կողմերը միմյանց դեմ ոխը դեռ չմոռացած, մեկ այլ հանրային հնչեղություն «վայելող» կռիվ սկսվեց՝ ՀՀԿ-ականների ու ՀՅԴ-ականների մասնակցությամբ:

Կոալիցիա կազմած ու իշխանություն դարձած այս կուսակցության անդամների վեճի առիթն ընտրողի քվեն է եղել: Բանն այն է, որ ԲՀԿ-ից ՀՀԿ-ի ճամբար տեղափոխված Բազմասեր Առաքելյանը, տեղեկանալով, որ իր հայրենի Փարփի գյուղի բնակիչներից մեկը իր ձայնը տալու է Դաշնակցությանը, նրան դաժան ծեծի է ենթարկել: ՀՅԴ-ի պատասխանն էլ չի ուշացել. խոստացել են համապատասխան քայլեր ձեռնարկել:

Օրերս «ռազբորկա» էր նաեւ Արարատի մարզի գյուղերից մեկում: ՀՀԿ-ական թեկնածուների ներկայացուցիչները ՀՅԴ-ի թեկնածուին մտերմաբար բացատրում էին, որ նա բարոյական իրավունք չունի գյուղացիներին կոչ անի քվեարկել իր եւ ՀՅԴ-ի օգտին, իսկ ամենավերջում միմյանց հետ են հարաբերություններ ճշտել, թե ՀՅԴ-ական թեկնածուն հատկապես , որ ՀՀԿ-ական թեկնածուի համար պետք է սուսուփուս նստի տանը եւ գլուխը պատուհանից չհանի:

Համապետական ընտրություններին քիչ ժամանակ է մնացել: Այսօրինակ դեպքեր նախատեսվածից շատ են լինելու: Ընտրողի քվեի համար իշխանության յուրաքանչյուր թեկնածու, օրինական կամ ոչ օրինական ճանապարհով, փորձելու է պայքարել՝ վերարտադրվելու նպատակով: Տարիների փորձը ցույց է տվել, որ Շիրակի մարզը, հատկապես Գյումրին զերծ չի մնացել նման պատմությունների մեջ ընկնելուց:
Նշենք, որ 2007 եւ 2012 թվականների ընտրությունները Գյումրիում անցել են հետընտրական կամ նախընտրական արյունալի բախումներով:

Այժմ Գյումրիում ստեղծված իրավիճակը իսկապես պայթյունավտանգ է, ցանկացած պահի կարող է լարված իրավիճակը դուրս գալ վերահսկողությունից: Սերժ Սարգսյանը Գյումրիում միմյանց դեմ է հանել նախկին եւ ներկա թշնամիների: Շիրակում առաջադրված հանրապետականի 13 թեկնածուները, ոչ վաղ անցյալում, պատգամավորական մանդատի համար լուրջ կռիվ են տվել միմյանց դեմ:

Մասնավորապես, Մարտուն Գրիգորյանը, երբ 2007 թվականին առաջին քայլերն էր անում մեծ քաղաքականությունում, ԱԺ ընտրության ժամանակ ՀՀԿ-ական «վետերան» Սուքիաս Ավետիսյանից շատ ձայներ հավաքեց եւ զբաղեցրեց նրա տեղը խորհրդարանում: Արդեն 2012-ին՝ Մարտուն Գրիգորյանը հաղթեց ՀՀԿ-ական Արման Սահակյանին:

Ընտրապայքարի, կռվի եւ սկանդալների այս եւ այլ փաթեթ ձեռքներին՝ նշյալ անձինք հանդես են գալիս արդեն ՀՀԿ-ի ռեյտինգային ցուցակով: Բնական է, որ նրանք չեն մոռացել նախկին տարաձայնությունները, իսկ այժմ էլ նոր ընտրական օրենսգրքի նախապայմանները թույլ չեն տալիս մոռանալ՝ յուրաքանչյուր թեկնածու պայքարելու է իր տեղի ու աթոռի համար: Չի բացառվում, որ նրանք եւս առաջիկայում բախումներ կունենան: Թերեւս առայժմ սկսվել է միմյանց վրա ցեխ շպրտելը՝ բամբասանքների տեսքով: Գյումրեցիները հիմա սպասում են, թե ում նյարդերն են առաջինը տեղի տալու: Բանն այն է, որ գյումրեցի թեկնածուներից յուրաքանչյուրն արդեն հասկացել է, որ Սերժ Սարգսյանը բոլորին առանձին-առանձին ասել է, թե հենց ինքն է իր ամենանախընտրած թեկնածուն:

Դավիթ Գասպարյան

Այս թեմայով Կարող եք քվեարկել առանց ռեյտինգային թեկնածուին ձայն տալու (Տեսանյութ) Ինչու եւ ումից են վախենում հայերը 2 Կարեն Կարապետյանը՝ ընդդեմ ռեյտինգային ընտրակարգի Ընտրողները չեն հասկանում, թե ինչ է ռեյտինգային ընտրակարգը Նրանք ձեզ զգուշացրել էին եղբայրասպան ռեյտինգային ընտրակարգի մասին