Ընտրողները չեն հասկանում, թե ինչ է ռեյտինգային ընտրակարգը

Առաջիկա խորհրդարանական ընտրություններն անցկացվելու են ռեյտինգային ընտրակարգով: Ի՞նչ է ռեյտինգային ընտրակարգը: Ցավալի է, բայց փաստ, որ մեկ ամիս հետո ընտրության առջեւ կանգնող քաղաքացին չունի այս հարցի պատասխանը:
Ըստ կենտրոնական ընտրական հանձնաժողովի հրապարակած տվյալների՝ թիվ 11 ընտրատարածքում, որն ընդգրկում է Շիրակի մարզն ու Գյումրի քաղաքը՝ հաշվառված է 231 հազար 982 ընտրող: Փորձեցինք Գյումրիի բնակիչների շրջանում հարցախույզ իրականացնել, պարզելու համար, թե բնակիչները արդյո՞ք տեղյակ են ռեյտինգային ընտրակարգից:

«Ինձ չի հետաքրքրում, որովհետեւ էս ընտրությունները հետաքրքիր չէ: Խելքս էդ ցուցակներից չի հասնում: Եթե դու գիտես՝ ինչ է ռեյտինգային թեկնածուն, ասա իմանամ: Հույս չունիմ, որ էս իշխանությունն արդար ընտրություն կկազմակերպե»,- ասում է գյումրեցի 57-ամյա Հայկը:

Ռեյտինգային թեկնածուներն ու ռեյտինգային ցուցակները գյումրեցի ընտրողներից շատերին ընդհանրապես չեն հետաքրքրում: Նրանք բարձրաձայնում են իրենց սոցիալական խնդիրների մասին. «Ընտրության չեմ գնալու, ոչ մեկին էլ չեմ ընտրելու: Իմ տան հարցը ո՞վ լուծեց, որ ես էլ իրեն ընտրեմ»,- նշում է Գյումրու Անտառավան թաղամասի տնակներից մեկի բնակիչը:

Եթե տարեցները տեղյակ չեն կամ չեն ցանկանում ծանոթանալ ռեյտինգային ընտրակարգին, ապա այլ է երիտասարդների դիրքորոշումը: Վերջիններիս մի բան է մտահոգում, որ շատ թաղամասերում նախապատվությունը տալիս են անհատների, չհասկանալով, որ քվեարկում են Սերժ Սարգսյանի օգտին: «Մեր թաղամասում բոլորը ցանկանում են ընտրել թեկնածուներից մեկին, ով ընդգրկված է հանրապետականի ռեյտինգային ցուցակում: Շատերը դժգոհ են Սերժ Սարգսյանից եւ նրա ղեկավարումից, բայց այդ անձի պատճառով ստիպված բնակիչները, նույնիսկ չհասկանալով, ընտրելու են հանրապետականին: Սա ընտրական օրենսգրքի կոպիտ սխալներից է, եւ արած է այնպես, որ ծառայի հօգուտ ՀՀԿ-ի»,- մեզ հետ զրույցում ասում է ուսանող Արամը:

Հարցման ընթացքում քիչ չեղան նրանք, ովքեր իրենց անտեղյակությունը եւ չհետաքրքվածությունը արդարացրեցին այն հանգամանքով, որ նախորդ ընտրությունների ժամանակ ում ընտրել են, խոստումը չեն տեսել:

Դավիթ Գասպարյան

Այս թեմայով Կարող եք քվեարկել առանց ռեյտինգային թեկնածուին ձայն տալու (Տեսանյութ) Ինչու եւ ումից են վախենում հայերը 2 Կարեն Կարապետյանը՝ ընդդեմ ռեյտինգային ընտրակարգի Նրանք ձեզ զգուշացրել էին եղբայրասպան ռեյտինգային ընտրակարգի մասին ՀՀԿ-ականների կռիվը թեւածում է քաղաքից քաղաք