Էբոլայի վարակակիրների թիվը Կոնգոյում գերազանցել է 11 հազարը

Կոնգոյի Դեմոկրատական Հանրապետությունում Էբոլա վիրուսով վարակվածների թիվը հասել է 11 042-ի, մահացել է 5387 մարդ։ Այս մասին հայտնել է երկրի կառավարությունը՝ վկայակոչելով առողջապահության նախարարության վերջին տվյալները։ Associated Press-ի փոխանցմամբ՝ սա երկրում երբևէ գրանցված Էբոլայի ամենածանր բռնկումն է։

Համաճարակը հայտարարվել է մայիսի կեսերին։ Վիրուսը տարածվել է երկրի 26 նահանգներից ութում։ Բռնկումը պայմանավորված է Բունդիբուգյո տեսակի վիրուսով, որի դեմ առայժմ հայտնի պատվաստանյութ կամ բուժման միջոց չկա։

Հիվանդության տարածումը զսպելու ջանքերը բարդանում են զինված հակամարտությունների, առողջապահական համակարգի ճգնաժամի, ճանապարհային վատ ենթակառուցվածքների և բնակիչների շրջանում տարածված ապատեղեկատվության պատճառով։ Իտուրի և Հյուսիսային Կիվու նահանգներում ռազմական գործողությունների վերսկսումը ևս խոչընդոտում է բուժաշխատողների մուտքը վարակված շրջաններ։

Վիրուսը տարածվել է նաև աֆրիկյան այլ երկրներում, այդ թվում՝ Ուգանդայում, Քենիայում և Նիգերիայում։

Ներկայիս բռնկումն արդեն համարվում է աշխարհում Էբոլայի երկրորդ ամենածանր համաճարակը։ Ամենամեծ բռնկումը գրանցվել էր Արևմտյան Աֆրիկայում 2014-2016 թվականներին, երբ վարակվել էր շուրջ 28 հազար մարդ, իսկ ավելի քան 11 հազարը մահացել էր։