Հունիսի 7-ի ընտրություններից հետո Գյումրիում պետք է տեղի ունենան ավագանու արտահերթ ընտրություններ․ Նիկոլ Փաշինյան

Գյումրիի Վարդանանց հրապարակից առանձին-առանձին դիմելով Շիրակի մարզի բոլոր համայնքների բնակիչներին՝ արձակուրդում գտնվող ՀՀ վարչապետ, «Քաղաքացիական պայմանագիր» կուսակցության վարչության նախագահ Նիկոլ Փաշինյանը հայտարարեց, որ Շիրակի մարզ իրենց այցելության առաջին օրը տեղի ունեցավ շատ կարևոր իրադարձություն՝ Հայաստանից արտահանումների և Հայաստան ներմուծումների համար բացվեց Ախալքալաք-Կարս երկաթուղին։ 

«Այսպիսով, Հայաստանը երկաթուղային հասանելիություն ստացավ դեպի Եվրամիության երկրներ, Եվրոպայի՝ ԵՄ չհանդիսացող երկրներ, ինչպիսիք են Մակեդոնիան, Մոնտենեգրոն, Մեծ Բրիտանիան, հասանելիություն ստացավ Թուրքիայի, Սիրիայի Արաբական Հանրապետության շուկաներին։ Սա շատ կարևոր իրադարձություն է, որովհետև մենք այսպիսով հաղթահարեցինք Հայաստանի ապաշրջափակման առաջին փուլը։ Հիմա մենք երկաթուղային կապ ունենք դեպի Արևմուտք և դեպի Արևելք: Սա առաջին, բայց ոչ ամբողջական փուլն է, առջևում մեզ սպասվում են մեծ իրադարձություններ»,- «Արմենպրես»-ի փոխանցմամբ՝ ընդգծեց նա՝ հիշեցնելով, որ առջևում TRIPP նախագծի իրագործումն է, որով կվերաբացվի Մեղրիով անցնող երկաթուղին և TRIPP նախագիծը կսկսի գործել Հայաստանի տարածքային ամբողջականության, իրավազորության, սահմանների անխախտելիության սկզբունքի հիման վրա։ 

Փաշինյանը նկատեց՝ TRIPP-ը Հայաստանի տնտեսական զարգացման ամենախոստումնալից նախագիծն է։ 

«Բոլոր նրանք, ովքեր մեզ մեղադրում էին միջանցքներ տալու, միջանցքներ խոստացած լինելու, Հայաստանի տարածքային ամբողջականությունը և իրավազորությունը նսեմացնելու մեջ, նրանք կանգնած են ֆիասկոյի առաջ։ TRIPP նախագիծը Հայաստանի տարածքային ամբողջականության, ինքնիշխանության, իրավազորության և ապաշրջափակման ամենաուժեղ խորհրդանիշն է, և Հայաստանի տնտեսական զարգացման ամենախոստումնալից նախագիծը։ 

Եվ հիմա շատ կարևոր է, թե այս ամեն ինչին ինչպես է արձագանքում Սյունիքի մարզը․ Սյունիքի մարզում և Մեղրիում անշարժ գույքի և հողի գները աճում են, որովհետև մարդիկ հասկանում են, որ Հայաստանի Հանրապետությունը, Սյունիքը և Մեղրին դառնում է խաղաղության խաչմերուկ։ Մեղրին, Սյունիքը ծայրամասից վեր են ածվում կենտրոնի։ Հայաստանի Հանրապետությունը պատերազմի փակուղուց վեր է ածվում խաղաղության խաչմերուկի», - ասաց Փաշինյանը։

Նիկոլ Փաշինյանը հայտեց նաև Շիրակի մարզում սպասվող նորությունների մասին՝ ընդգծելով, որ Շիրակում ևս մեծ իրադարձություններ են սպասվում։

«Առաջիկայում մենք մեկնարկում ենք Ախուրիկի երկաթուղային հանգույցի նորոգումը և պատրաստվում ենք Ախուրիկ-Աքյաքա երկաթուղու վերաբացմանը։ 

Նաև ասեմ՝ մենք չէինք նկատել, բայց միջազգային փորձագետները 2025 թվականի օգոստոսի 8-ից հետո համակ ուշադրությամբ հետևում են Հայաստանին և Հայաստանում տեղի ունեցող պրոցեսներին, նկատել են, որ Արևմուտքից Արևելք կամ Արևելքից Արևմուտք ամենակարճ ճանապարհն անցնում է Հայաստանի Հանրապետության Տավուշի, Լոռիի և Շիրակի մարզով։ Հիմա միջազգային ներդնողները մեզ մոտ են եկել նոր առաջարկով՝ կառուցելու Արևելք-Արևմուտք նոր մայրուղի, որն, ինչպես Հյուսիս-Հարավը, նույնպես անցնելու է Շիրակի, Տավուշի, Լոռիի մարզերով։ Առաջիկա տարիներին երկաթուղուն զուգահեռ մենք կսկսենք նաև ավտոճանապարհի կառուցումը, որը կլծառայի Արևելք-Արևմուտք ճանապարհին և կլինի Կենտրոնական Ասիան Արևմուտքին կապող ամենակարճ ճանապարհը»,- հայտարարեց Փաշինյանը՝ նկատելով, որ այս նախագծերի շնորհիվ միլիոավոր դոլարներ կներդրվեն Հայաստանում։  

Վարչապետի խոսքով՝ Հայաստանի Հանրապետությունն այդկերպ դառնալու է ծաղկուն, զարգացած, բարեկեցիկ, որովհետև Հայաստանի Հանրապետությունը, այդ թվում՝ Շիրակի մարզը, դառնում է խաղաղության խաչմերուկ։ 

«Այսօր ոմանք անուն են դնում ժողովրդի կողմից այսքան սիրված այս խորհրդանիշին (ցույց է տալիս ՀՀ քարտեզը՝ խմբ․), որը խորհրդանշում է Հայաստանի պետությունը, Հայաստանի Հանրապետության միջազգայնորեն ճանաչված, միջազգայնորեն սահմանված տարածքները։ Նրանք մեզ մեղադրում են, թե մենք ինչու ծովից ծով Հայաստանի քարտեզ չենք կպցնում մեր կրծքերին, իսկ դրա պատճառը մեկն է․ որովհետև այդ գաղափարաբանությունը նշանակում է նոր պատերազմներ Հայաստանի համար։ Նոր պատերազմներ, որոնցում պատերազմի եռագլուխ կուսակցության զավակներից ոչ մեկը չի մասնակցելու և առավել ևս չի զոհվելու։ Ավելին ասեմ՝ այդ մարդիկ, ովքեր այսօր խոսում են ծովից ծով Հայաստանի մասին, նրանք բոլորը ունեն բնակարաններ, վիլաներ, կղզիներ Հայաստանի Հանրապետությունից դուրս։ ՀՀ-ն նրանց համար ապրելու վայր չէ, ՀՀ-ն նրանց համար խոպան է, որտեղ նրանք գալիս են ժողովրդին հարստահարելու, Հունաստաններում, Դուբայներում, Եվրոպաներում, Ամերիկաներում տներ առնելու։ Նրանք մեզ ուզում են ներքաշել նոր կռիվների, նոր պատերազմների մեջ՝ հայրենասիրական կեզղծ կոչերով, բայց մենք ասել ենք և ասում ենք՝ հայրենիքը պետությունն է։ Մենք սիրում ենք մեր հայրենիքը, Հայաստանի Հանրապետությունը, և այլևս թույլ չենք տալու, որ այն դարձնեն կոնֆլիկտների և պատերազմների կոխան։ Մենք ուզում ենք, որ Հայաստանի Հանրապետությունում մեր սերունդներն ապրեն դարեդար, ապրեն ազատ և երջանիկ», - հավելեց Փաշինյանը։

Փaշինյանն ընդգծեց՝ 2018 թվականից հետո Գյումրիում քաղաքային իշխանությունները բոլորովին ուրիշ օրակարգ են ունեցել․ 

«Նրանց խնդիրն է եղել Գյումրիի ժողովրդին հանել Կառավարության դեմ, հիասթափություն տարածել Կառավարության նկատմամբ, և Կառավցարությանն էլ համոզել, թե Գյումրիում ամեն ինչ էնպես է, ինչպես պետք է ընթանա։ Ես հիմա հասկանում եմ, որ մենք Գյումրիի վերադարձնելու շատ մեծ պարտք ունենք»,- նշեց Նիկոլ Փաշինյանը՝ հայտարարելով, որ այս պահից սկսած Գյումրիում տեղի ունեցող բոլոր պրոցեսների համար, քաղաքի բարեկեցության ու վերակառուցման համար անձամբ ինքն է կրում պատասխանատվություն և պարտավորություն։ 

Նիկոլ Փաշինյանը հայտարարեց՝ 2026 թվականի հունիսի 7-ի ընտրություններից հետո Գյումրիում պետք է տեղի ունենան ավագանու արտահերթ ընտրություններ։

«Ժողովրդական իշխանություն պետք է հաստատենք Գյումրիում, որպեսզի Գյումրին ծաղկի ինչպես Հայաստանի Հանրապետության մյուս քաղաքները։ Հեղափոխությունն ի վերջո պետք է բերի իր օգուտները Գյումրի քաղաքին»,- եզրափակեց Փաշինյանը։