Իրանի նոր առաջնորդի գաղտնիքը. բնակարաններ Լոնդոնում՝ Իսրայելի դեսպանատան հարևանությամբ

Բրիտանական Telegraph-ը ուշագրավ բացահայտում է արել Իրանի նոր առաջնորդ Մոջթաբա Խամենեիի վերաբերյալ։ Պարզվում է, որ Այաթոլլահ Խամենեիի որդին, ով համարվում է հոր իրավահաջորդը, Լոնդոնի ամենաշքեղ թաղամասերից մեկում՝ Հարավային Քենսինգթոնում, սեփական բնակարաններ ունի։ Այս բացահայտումն առավել սկանդալային է դառնում այն պատճառով, որ այդ գույքը գտնվում է Իսրայելի դեսպանատան անմիջական հարևանությամբ։

Հատկանշական է, որ Իրանի իշխանությունները տարիներ շարունակ կոչ են անում ոչնչացնել Իսրայելը, սակայն նրանց վերնախավի ներկայացուցիչները միլիոնավոր ֆունտեր են ներդնում հենց թշնամի պետության դիվանագիտական ներկայացուցչությունից ընդամենը մի քանի տասնյակ մետր հեռավորության վրա։

Խոսքը Լոնդոնի հեղինակավոր «Prince’s Gate» հասցեում գտնվող երկու շքեղ բնակարանների մասին է։ Այս բնակարանների ընդհանուր շուկայական արժեքը գնահատվում է ապշեցուցիչ 13,5 միլիոն ֆունտ ստերլինգ, որոնք տեղակայված են 27 և 28 համարների շենքերում։ Այս բնակարանները Իսրայելի դեսպանատնից հեռու են ընդամենը 100 յարդ, ինչը մոտավորապես 90 մետր է։ Նման մոտիկությունը նշանակում է, որ Իրանի նոր առաջնորդի սեփականությունը գտնվում է նույն այն անվտանգության գոտում, որտեղ տեղակայված է իրենց գլխավոր հակառակորդի դեսպանատունը։ 

Այս գույքը ձեռք է բերվել բարդ սխեմաներով և օֆշորային ընկերությունների միջոցով, որոնք կապվում են Խամենեիի ընտանիքի վերահսկողության տակ գտնվող հսկայական տնտեսական կայսրության հետ։

Այս բնակարանների արժեքը գնահատվում է միլիոնավոր ֆունտ ստերլինգներ, ինչը կտրուկ հակասում է Իրանի ներսում քարոզվող համեստ կենցաղի և արևմտյան արժեքների մերժման գաղափարախոսությանը։

Հատկանշական է, որ Մոջթաբա Խամենեին դեռևս 2019 թվականից գտնվում է ԱՄՆ-ի պատժամիջոցների տակ, սակայն դա չի խանգարել նրա ընտանիքին պահպանել կապիտալը Բրիտանիայի մայրաքաղաքում։