Politico. ԵՄ երկրները կործանիչներ չեն մատակարարի Ուկրաինային

Լեհաստանը կործանիչներ չի ուղարկի Ուկրաինա։ Սա վերջինն է ԵՄ երկրների կողմից նմանատիպ հերքումների շարքից, գրում է Politico-ն։

Բացի Լեհաստանից, Բուլղարիայի եւ Սլովակիայի կառավարությունները եւս վերջերս բացառել են ռազմական ինքնաթիռների մատակարարումն Ուկրաինային։ Միեւնույն ժամանակ, ուկրաինացի պաշտոնյաներից մեկը հայտարարել է, որ ուկրաինացի օդաչուները լքել են երկիրը, որպեսզի ստանան ԵՄ երկրների կողմից նվիրված ինքնաթիռները։

Նման հակասական հայտարարություններ են արվել՝ Ուկրաինային ռազմական օգնություն հասցնելու համար որպես տեղափոխման համակարգող հանդես եկող ԵՄ-ի փորձերի առաջին օրերին։

Պատմական քայլ կատարելով՝ ԵՄ-ն կիրակի հայտարարել է, որ կստանձնի զենքի եւ այլ ռազմատեխնիկայի տեղափոխման դերը՝ օգտագործելով ԵՄ-ի 450 միլիոն եվրոյի չափով ֆինանսավորումը։

Երկուշաբթի երեկոյան ուկրաինացի պաշտոնյան հայտնել է, որ օդաչուները ժամանել են Լեհաստան, որպեսզի ստանան ինքնաթիռները։ Խոսքը սովետական դարաշրջանի ռեակտիվ ինքնաթիռների մասին է, ինչպես օրինակ՝ ՄիԳ-29-ը։ Ուկրաինայի խորհրդարանը նույնիսկ կոնկրետացրել է նվիրաբերումը․ Եվրոպան ընդհանուր առմամբ 70 կործանիչ է ուղարկել, այդ թվում՝ 28 ՄիԳ-29 Լեհաստանից, 12-ը՝ Սլովակիայից, 16-ը՝ Բուլղարիայից, ինչպես նաեւ 14 ՍՈՒ-25՝ Բուլղարիայից։

Դա այդպես չէ, նշել են երկրները։

Բուլղարիայի վարչապետ Կիրիլ Պետկովը պարզաբանել է, որ իր երկիրը ինքնաթիռների եւ պահեստամասերի, ինչպես նաեւ սեփական օդային տարածքը պահպանելու համար կործանիչների պակաս ունի, եւ այս դեպքում խոսք լինել չի կարող Ուկրաինային ինքնաթիռների տրամադրման մասին։ Սլովակիայի պաշտպանության նախարարության ներկայացուցիչը եւս հերքել է նվիրաբերման մասին տեղեկությունը։

Երեքշաբթի նրանց է միացել Լեհաստանի նախագահ Անջեյ Դուդան։ Նա ՆԱՏՕ-ի գլխավոր քարտուղար Յենս Սթոլթենբերգի մասնակցությամբ Լասկում գտնվող ավիաբազայում ելույթի ժամանակ ասել է, որ իր երկիրը «մտադիր չէ ինչ-որ ինքնաթիռներ ուղարկել Ուկրաինայի օդային տարածք»։ Նրա խոսքով՝ «դա կհանգեցնի միջամտության Ուկրաինայի հակամարտությանը»։

ՆԱՏՕ-ն, Դուդայի խոսքով, Ուկրաինայի դեմ Ռուսաստանի պատերազմում կողմ չի համարվում։

Ժամեր անց Լեհաստանի վարչապետ Մատեուշ Մորավեցկին հանդես է եկել ուղիղ հերքմամբ․«Լեհաստանի նման ծրագրեր չունի»։

Կործանիչների մատակարարման մասին խոսակցությունները շրջանառվել են ԵՄ արտաքին քաղաքական գերատեսչության ղեկավար Ժոզեպ Բորելի հայտարարությունից հետո։

«Մենք պատրաստվում ենք․․․նույնիսկ կործանիչներ մատակարարել»,- ասել էր Բորելը։

Սակայն ավելի ուշ Բորելը խոստովանել է, որ չնայած կործանիչները եղել են «օգնության մասին դիմումի մի մաս, որը ստացվել է Ուկրաինայից», սակայն ԵՄ-ն բավարար ֆինանսական միջոցներ չունի դրանց դիմաց վճարելու համար։

Դիվանագետների խոսքով՝ Բորելը ոչ պաշտոնապես խնդրել է Բուլղարիային, Լեհաստանին եւ Ռումինիային Կիեւին մի քանի ինքնաթիռ մատակարարել։

ԵՄ դիվանագետներից մեկն ասել է, որ ԵՄ երկրներին «զայրացրել է» Բորելի հրապարակային հայտարարությունը կործանիչների մատակարարման մասին, որը համաձայնեցված չէր։ «Նման հայտարարություն անել այն օրը, երբ ՌԴ նախագահ Վլադիմիր Պուտինը հայտարարում է իր զորքերը մարտական պատրաստվածության բերելու մասին, իրավիճակի հետագա սրման ռիսկ է»,- ասել է ԵՄ դիվանագետը։