Եվրոպայում գազի ֆյուչերսների գինը գերազանցել է 1000 դոլարը

Եվրոպայում գազի ֆյուչերսների արժեքը կրկին գերազանցել է 1000 դոլարը, տեղեկացնում է Газета-ն՝ հղում կատարելով Լոնդոնի ICE բորսայի տվյալներին։

Փետրվարյան ֆյուչերսների գինը ICE Futures հարթակում աճուրդների բացման պահին կազմում էր 1028,2 դոլար, նվազագույնը կազմել է 996,7 դոլար։ Մոսկվայի ժամանակով ժամը 10.18-ին ֆյուչերսները վաճառվում էին 1000 դոլարով՝ 7,5 տոկոսով ավելի նախօրեի արժեքից (մոտ 940 դոլար)։

Դեկտեմբերի 31-ին գազի գինն իջել էր 800 դոլարից՝ առաջին անգամ նոյեմբերի 10-ից ի վեր։ Դեկտեմբերի 21-ին վառելիքի բորսայական գինը Եվրոպայի տարածքում առաջին անգամ անցել էր պատմական առավելագույնը՝ հազար խորանարդ մետրը 2 հազար դոլար։

Փորձագետները գազի արժեքի աճը կապում են եվրոպական ստորգետնյա պահեստարանների բեռնվածության ցածր մակարդակի, հիմնական մատակարարների սահմանափակ առաջարկների եւ Ասիայում հեղուկացված գազի բարձր պահանջարկի հետ։ Բացի այդ, իրավիճակի վրա ազդեցություն է ունենում նաեւ եղանակային գործոնը, ինչպես նաեւ իրավիճակը «Հյուսիսային հոսք – 2» ռուսական գազատարի հետ կապված, որի գործարկումը նախատեսվում է 2022թ. երկրորդ կիսամյակում։