Իլոն Մասկը վաճառել է եւս 1,02 մլրդ դոլարի ակտիվներ

Tesla-ի եւ SpaceX-ի գլխավոր տնօրեն Իլոն Մասկը վաճառել է եւս 934 090 բաժնեթուղթ կամ 1,02 մլրդ դոլարի ակտիվներ, տեղեկացնում է CNBC-ն։

Այս եռամսյակում իր օպցիոններն իրացնելու ընթացքում Մասկի ներդրումները Tesla-ում ավելացել են՝ 170,5 մլն-ից հասնելով 177 մլն բաժնեթղթի, ինչպես առաջին անգամ տեղեկացրել է Wall Street Journal-ը։

Նոյեմբերի 8-ից Մասկը սկսել է վաճառել իր ակտիվները, մասամբ որպեսզի վճարի հարկային հաշիվները։

Նոյեմբերի առաջին շաբաթվա ընթացքում Մասկը հարցրել է Թվիթերի իր տասնյակ միլիոնավոր բաժանորդներին՝ արժե՞ արդյոք, որ վաճառի Tesla-ում իր բաժնեմասի 10 տոկոսը։ Նրանք կողմ են քվեարկել։ Բայց վաճառքի մեծ մասը, որը հաջորդել է հարցմանը Թվիթերում, եղել է այս տարվա սեպտեմբերին Մասկի ընդունած պլանի մի մասը։

10b5-1 կանոնների համաձայն՝ կորպորատիվ ինսայդերները (ներառյալ գլխավոր տնօրենները) կարող են վաճառել իրենց սեփական բաժնեթղթերը պորտֆելի կառավարման նախապես հայտարարված պլանի շրջանակում։ Նրանք պետք է նախապես հայտարարեն, թե երբ եւ ինչպես են ծրագրում վաճառել, որպեսզի պաշտպանեն իրենց ինսայդերական առեւտրի հետագա մեղադրանքներից։

Այս տարի Tesla-ի արժեթղթերը թանկացել են ավելի քան 54 տոկոսով, ինչը Մասկին դարձրել է աշխարհի ամենահարուստ մարդը։ Forbes-ի գնահատականներով՝ նրա կարողությունը ներկա պահին գերազանցում է 275 մլրդ դոլարը։

Այդ հարստությունը կապված է Tesla-ում եւ SpaceX-ում Մասկի սեփականության բաժնեմասերի հետ։ Ներկայում նա աշխատավարձ կամ դրամական բոնուսներ չի ստանում եւ մինչեւ այս տարի չի վաճառել Tesla-ի բաժնեթղթերի մեծ քանակություն։ Դրա փոխարեն նա վերցնում էր զգալի վարկեր Tesla-ի իր բաժնեթղթերի մի մասի դիմաց։

Ինչպես ավելի վաղ տեղեկացրել էր ProPublica-ն, քանի որ հարկատուները շահույթի կամ արժեթղթերի հարկ են վճարում դրանց վաճառքից հետո, Մասկը երբեք հարկերի մեծ գումարներ չի վճարել իր սեփական կապիտալի համեմատ։

Հիմա սպասվում է, որ Մասկը կվճարի, հավանաբար, ամենամեծ միասնական անհատական հարկը ԱՄՆ պատմության մեջ, ընդ որում՝ դաշնային հարկերը եւ եկամտահարկը Կալիֆոռնիայում գնահատվում են 11 մլրդ դոլար։ Նա պետք է վճարի այդ հարկային հաշիվը, որպեսզի փոխհատուցում ստանա ավելի քան 23 մլրդ դոլարի չափով՝ որպես բաժնեթղթերի օպցիոններ, որոնց գործողության ժամկետը հակառակ դեպքում կլրանար օգոստոսին։