NYT. ԱՄՆ-ն աշխատում է Ուկրաինային հետախուզական տվյալներ տրամադրելու ծրագրի վրա՝ Ռուսաստանի «ներխուժման» պատճառով

ԱՄՆ-ն աշխատում է Ուկրաինային հետախուզական տվյալներ տրամադրելու ծրագրի վրա՝ Ռուսաստանի «ներխուժման» պատճառով, գրում է The New York Times թերթը՝ հղում անելով ամերիկյան վարչակազմի բարձրաստիճան ներկայացուցիչներին։

Սպիտակ տան, Պենտագոնի եւ Պետդեպարտամենտի կողմից քննարկվող միջոցառումների թվում են նախկինում աֆղանստանի զինվորականների համար նախատեսված ռազմական ուղղաթիռների եւ այլ ռազմատեխնիկայի մատակարարումն Ուկրաինային։ Բացի այդ, ԱՄՆ վարչակազմը քննարկում է կիբեռոլորտում հավելյալ մասնագետներ ուղարկելու հարցը։

Թերթը նշում է, որ ԱՄՆ տեղեկատվությունը կարող է ներառել լուսանկարներ, որոնցով հնարավոր կլինի պարզել, թե արդյոք ռուսական զորքերը տեղաշարժվում են՝ սահմանը հատելու համար, որպեսզի ուկրաինացի զինվորականները կարողանան կանխել հարձակումը, փոխանցում է ՏԱՍՍ-ը։