Պատերազմը հնարավոր էր կանխել. Սերժ Սարգսյան

Հնարավո՞ր էր կանխել արցախյան վերջին պատերազմը: ՀՀԿ համագումարին ՀՀ երրորդ նախագահ Սերժ Սարգսյանը հայտարարեց՝ այո՛, հնարավոր էր:

«Եթե, այնուամենայնիվ, ռազմական գործողություններ սկսվեին, հնարավո՞ր էր պատերազմում խուսափել այսքանից կորուստներից, այո՛, այսպիսի ծանր կորուստներից հնարավոր էր խուսափել: Հնարավո՞ր էր նոյեմբերի 9-ից հետո չեզոքացնել նոր սպառնալիքները, այո՛, հնարավոր էր: Բանավոր պայմանավորվածություններով տարածքային զիջումները թուլամորթություն էին, նոյեմբերի 9-ի հայտարարության գերիների հետ կապված 8-րդ կետի կատարմանը չհասնելը և պատասխանատվությունից խուսափելու նպատակով նրանց բոլորին դասալիք անվանելը՝ տմարդություն: Իսկ զինադադարի պայմաններում 80-ից ավելի նոր գերիների դեպքերը՝ անճարակության արդյունք»,- նշեց Սերժ Սարգսյանը՝ հիշեցնելով, որ պատերազմից հետո կապիտուլյանտ իշխանությունները հերոսացնում էին գերեվարվածներին, ընտրությունների նախաշեմին նրանց հարազատներին և հասարակությանը սուտ խոստումներ տալիս, թե՝ մի քանի ամիս էլ համբերեք, կվերադարձնենք մեր հերոս տղաներին: Բայց ըստ Սերժ Սարգսյանի, անցան ամիսներ, մեկ տարի, և մատը մատին չտալուց հետո ստորաբար հայտարարում են, թե պետք է պարզել՝ ինչ հանգամանքներում են գերի ընկել, հնարավոր է՝ դասալիք են:

«Ինչո՞ւ սա չէին ասում մեկ տարի առաջ, ինչո՞ւ են իրենց անճարակությունը բարդում մեր զինվորների վրա: Բանակը քայքայելու, մինչև վերջ վարկաբեկելու սցենարի հերթական արա՞րն է»,- հարցադրում արեց Սերժ Սարգսյանը: