Պորոշենկոն ներխուժել է ուղիղ եթեր. Դուք պետբյուջեից գումարներ եք վատնում
Ուկրաինայի հինգերորդ նախագահ Պյոտր Պորոշենկոն ներխուժել է խորհրդարանի շենքում գտնվող Ռադա հեռուստաալիքի տաղավար ուղիղ եթերի ժամանակ, հաղորդում է Liga.net-ը։
Պորոշենկոն հայտնվել է կադրում, երբ հաղորդավարները հարցազրույց էին վերցնում ազգային պատգամավոր Դանիիլ Գետմանցեւից։
«Դուք խանգարում եք պատգամավորների աշխատանքին»,-ասել է նա եւ վրդովվել, որ պետբյուջեից գումարներ են ծախսվում հեռուստաալիքի վրա՝ շրջանցելով Prozorro համակարգը։
Հինգերորդ նախագահին հրավիրել են մասնակցելու ծրագրին, սակայն նա հրաժարվել է՝ պատճառաբանելով, որ հեռուստաալիք ստեղծելու նախագահի աշխատակազմի գաղափարը խանգարում է խորհրդարանի աշխատանքին։
Նորացված Ռադա ալիքը սկսել է հեռարձակվել դեկտեմբերի 15-ին։ Մի քանի ստուդիա են սկսել աշխատել, որոնցից մեկը նախարարների կաբինետում է, երկրորդը՝ Ռադայի ճեմասրահում։