Ֆրանսիայում ստուգում են Խաշոգջիի սպանությանն առնչություն ունենալու կասկածանքով ձերբակալված տղամարդու ինքնությունը
Ֆրանսիայի իշխանությունները ստուգում են 2018 թվականին սաուդցի լրագրող Ջամալ Խաշոգջիի սպանությանն առնչություն ունենալու կասկածանքով ձերբակալված տղամարդու ինքնությունը։
Հալեդ Ալոթայիբի անունով տղամարդը մեկն է այն 26 մարդկանցից, ովքեր հեռակա կարգով դատվում են Թուրքիայում։
«Նրա ինքնությունը ճշտելու գործընթաց է ընթանում։ Հուսով ենք, որ շուտով պարզաբանումներ կստանանք»,-լրագրողներին ասել է կառավարության ներկայացուցիչ Գաբրիել Աթալը։
Աթալը հաստատել է, որ տղամարդը կալանավորվել է Ինտերպոլի օրդերի հիման վրա։
Փարիզում Սաուդյան Արաբիայի դեսպանատունը հայտարարություն է տարածել, որում նշվում է, որ ձերբակալվածը «գործի հետ կապ չունի» եւ պահանջել է անհապաղ ազատ արձակել նրան։
Այժմ Ստամբուլում 26 սաուդցիներ հեռակա կարգով դատվում են սպանության գործով։ Ալոթայբին նաեւ այն 17 մարդկանցից մեկն է, ում նկատմամբ 2018 թվականին ֆինանսների նախարարությունը պատժամիջոցներ է սահմանել սպանության մեջ դերի համար։