Պակիստանը կարող է Հնդկաստանից իր տարածքով հումանիտար մատակարարումներ թույլատրել Աֆղանստան
Պակիստանը կարող է Հնդկաստանից իր տարածքով հումանիտար մատակարարումներ թույլատրել Աֆղանստան։ Իսլամաբադը պատրաստ է բացառության կարգով դիտարկել Հնդկաստանից Պակիստանի տարածքով Աֆղանստան ցորենի հումանիտար մատակարարումների հարցը։ Այս մասին ուրբաթ երեկոյան Twitter-ի իր էջում հայտնել է Պակիստանի վարչապետ Իմրան Խանի գրասենյակը, փոխանցում է ՏԱՍՍ-ը։
«Վարչապետն ասել է, որ ներկա համատեքստում Պակիստանը դրականորեն կդիտարկի Հնդկաստանի կողմից առաջարկված ցորենը Պակիստանով փոխադրելու աֆղանցի եղբայրների խնդրանքը՝ որպես մարդասիրական նպատակներով բացառություն եւ մշակվելիք ընթացակարգերի համաձայն»,- ասվում է հայտարարության մեջ։
Հոկտեմբերին Հնդկաստանը Պակիստանին խնդրել էր թույլատրել 50 000 տոննա ցորեն տեղափոխող բեռնատարների շարասյուների անցումը Աֆղանստան: Նյու Դելին պատրաստակամություն էր հայտնել լայնածավալ մարդասիրական օգնություն ցուցաբերել աֆղանցի ժողովրդին։ Սակայն Պակիստանն ավանդաբար թույլ չի տալիս Հնդկաստանից իր տարածքով բեռնափոխադրումներ կատարել Աֆղանստան։