Կորոնավիրուսի դեմ չպատվաստված միլիոնավոր ավստրիացիներ կարող են կրկին կարանտինացվել

Կորոնավիրուսի դեմ չպատվաստված միլիոնավոր ավստրիացիներ կարող են կարանտինում հայտնվել. Կանցլեր Ալեքսանդր Շալենբերգն ասել է, որ Ավստրիային մի քանի օր է մնում COVID-19-ի դեմ ոչ լիարժեք պատվաստված միլիոնավոր մարդկանց կարանտինացումից, քանի որ ամենօրյա վարակման թվերը բոլոր ժամանակների բարձր մակարդակի վրա են, եւ ինտենսիվ թերապիայի բաժանմունքները գնալով ավելի են ծանրաբեռնվում, հայտնում է Reuters-ը։

Ազգային վիճակագրությունը ցույց է տալիս, որ Ավստրիայի բնակչության մոտ 65 տոկոսը լիովին պատվաստված է կորոնավիրուսի դեմ։ Ավստրիայում պատվաստումների ամենացածր մակարդակն է Արեւմտյան Եվրոպայի երկրներից, բացառությամբ փոքրիկ Լիխտենշտեյնի, վկայում են Հիվանդությունների կանխարգելման եւ վերահսկման եվրոպական կենտրոնի տվյալները: Շատ ավստրիացիներ թերահավատորեն են վերաբերվում պատվաստումներին` տեսակետ, որը պաշտպանում է ծայրահեղ աջ Ազատություն կուսակցությունը, որը մեծությամբ երրորդն է խորհրդարանում:

Կառավարության լրացուցիչ ծրագրի համաձայն` եթե ինտենսիվ թերապիայի մահճակալների 30 տոկոսը զբաղեցնեն COVID-19-ով հիվանդները, մարդիկ, ովքեր չեն պատվաստվել կորոնավիրուսի դեմ, մեկուսացման մեջ կհայտնվեն՝ իրենց ամենօրյա տեղաշարժի սահմանափակումներով։ Այժմ մահճակալների զբաղվածությունը 20 տոկոս է, եւ այդ թիվն արագ աճում է։

«Ըստ փուլային ծրագրի` մենք իրականում ունենք ընդամենը մի քանի օր չպատվաստված մարդկանց մեկուսացնելու համար»,- ասել է Շալենբերգը ՝ հավելելով, որ Ավստրիայում պատվաստումների մակարդակը «ամոթալի ցածր է»:

Կառավարությունը հայտարարել է, որ արգելում է չպատվաստվածներին օգտվել ռեստորանների, թատրոնների, լեռնադահուկային վերելակների եւ վարսահարդարների ծառայություններից:

Ավստրիայում աճը տեղի է ունենում այն ​​ժամանակ, երբ արեւելյան Եվրոպայի` մայրցամաքում պատվաստումների ամենացածր ցուցանիշներով երկրներում գրանցվում է բնակչության մեկ շնչին բաժին ընկնող օրական մահացության ամենաբարձր ցուցանիշներից մեկն աշխարհում: