Ավստրիան սահմանափակումներ է ներդրել COVID-19-ի դեմ չպատվաստվածների համար

Երկուշաբթի օրվանից Ավստրիայի իշխանությունները սահմանափակել են COVID-19-ից չպատվաստվածների ընդունելությունը ռեստորաններ, գեղեցկության եւ մերսման սրահներ, ֆիթնես կենտրոններ, սպորտային ակումբներ, հյուրանոցներ, կինոթատրոններ եւ թատրոններ։ Այդպիսի հանրային հաստատություններ այժմ կարող են այցելել միայն «երկու Պ»-երի ավստրիական կանոնին համապատասխանող վկայականներ ունեցողները, այսինքն՝ պատվաստվածները կամ կորոնավիրուսային վարակից ապաքինվածները։ Ընդ որում, ամբողջական իմունիզացիայի պահից պետք է անցնի ոչ ավելի, քան ինը ամիս, իսկ ապաքինման պահից` ոչ ավելի, քան վեց ամիս։

Ավստրիայում կորոնավիրուսային սահմանափակումների խստացումը հետեւել է վերջին շաբաթվա ընթացքում COVID-19-ով վարակվածների թվի ռեկորդային աճին՝ ավելի քան 9 հազար դեպք: Եթե ​​մինչ այդ մոտ մեկ տարի հասարակական հաստատություններ եւ ժամանցային միջոցառումներ այցելուները պատվաստումների կամ տարած հիվանդության մասին վկայականների հետ միասին կարող էին բացասական ՊՇՌ թեստ ներկայացնել, ապա այժմ չպատվաստված բնակչությունը չի կարողանա օգտվել այդ հնարավորությունից։ Հակամարմինների թեստերը, որոնք մուտք գործելու համար կարող էին օգտագործվել այն անձանց կողմից, ովքեր ասիմպտոմատիկ են տարել հիվանդությունը եւ ովքեր չունեն տարած հիվանդության այլ հաստատում, նույնպես դադարում են գործել:

Ինչպես կիրակի հայտնել են առողջապահության նախարարությունից, Ավստրիայում նոյեմբերի 8-ից «երկու Պ»-երի կանոնը սկսում է գործել այնտեղ, որտեղ գործում էր «երեք Պ»-երի կանոնը [պատվաստված, տարել է հիվանդությունը, թեստ է հանձնել]. այսուհետ մուտքը հանրային հաստատություններ կտրամադրվի միայն պատվաստված եւ հիվանդությունը տարածներին: Մինչեւ դեկտեմբերի 6-ը, բացառության կարգով, հաստատություններ կարող են այցելել միայն ՊՇՌ թեստ հանձնած այն անձինք, ովքեր պատվաստված են պատվաստանյութի առաջին բաղադրիչով։ «Երկու Պ»-երի կանոնը վերաբերում է ավելի քան 25 մասնակից ներառող միջոցառումներին, սակայն չի տարածվում թանգարանների վրա։

Ավստրիայի կառավարության նորամուծությունը փաստացի արգելք չի սահմանել չպատվաստված մարդկանց` մշակութային եւ զվարճանքի հաստատություններ այցելելու համար։ Նոր սահմանափակող միջոցները ստիպել են չպատվաստվածներին զանգվածաբար պատվաստել։ Ինչպես համոզվել է ՏԱՍՍ-ի թղթակիցը Վիեննայում, այս շաբաթվա վերջին պատվաստման կենտրոնները պատվաստվել ցանկացողների հոսք են գրանցել։ Առողջապահության նախարարության տվյալներով՝ շաբաթ օրը կատարվել է գրեթե 32 հազար պատվաստում։ Ավստրիայում պատվաստման համար կարելի է ընտրել Եվրոպական միությունում գրանցված չորս դեղամիջոց:

«Երկու Պ»-երի կանոնը խախտողներին կսպառնա մինչեւ 500 եվրո տուգանք։ Բացառություններ են արվում այն ​​մարդկանց համար, որոնց պատվաստումը հակացուցված է բժշկական պատճառներով, ինչպես նաեւ` մինչեւ 15 տարեկան դպրոցականների համար։ Մասնավորապես, մինչեւ 15 տարեկան երեխաներին դեռեւս թույլատրվում է կորոնավիրուսի թեստ հանձնել՝ սրճարան կամ կինոթատրոն գնալու համար։