Սիերա Լեոնեում մոտ 100 մարդ զոհվել է բենզատարի պայթյունի հետեւանքով
Աֆրիկյան Սիերա Լենոեում տեղի է ունեցել պայթյուն բենզատարի եւ բեռնատարի բախման հետեւանքով։ Այս մասին տեղեկացրել է մայրաքաղաք Ֆրիթաունի քաղաքապետ Իվոն Աքի Սավիերը, հաղորդում է «Газета Ру»-ն։
Միջադեպը տեղի է ունեցել Վելինգթոնի բնակելի թաղամասում։
«Ըստ լուրերի՝ զոհվել է ավելի քան 100 մարդ։ Նյութական վնասի չափը հայտնի չէ»,- գրել է քաղաքապետը Ֆեյսբուքում։ Նա ցավակցություն է հայտնել զոհվածների հարազատներին։
Նշվում է, որ երկու բեռնատարների բախումից հետո տեղի բնակիչները շտապել են հավաքել բենզատարից հոսող բենզինը։ Այդ պահին տեղի է ունեցել պայթյունը։ Հրդեհն ընդգրկել է մոտակա բնակելի տները, տեղեկացնում է Daily Sabah-ը։