Ավստրալիայի վարչապետը չի պատասխանի Ֆրանսիայի նախագահի «անձնական նկատողություններին» խաբեության մասին

Ավստրալիան կսպասի, մինչեւ որ «Ֆիանսիայի նեղացածությունը սուզանավերի պայմանագրի խզման հետ կապված կանցնի, եւ չի պատասխանի «անձնական նկատողություններին»։ Այսպիսի հայտարարությամբ երկուշաբթի հանդես է եկել Ավստրալիայի վարչապետ Սքոթ Մորիսոնը՝ ելույթ ունենալով լրագրողների համար ճեպազրույցում, տեղեկացնում է ՏԱՍՍ-ը։

«Ես հասկանում եմ, որ նա [Ֆրանսիայի նախագահ Էմանուել Մակրոնը] խիստ վրդովված է եւ մի քանի անձնական նկատողություն է արել, բայց ես չեմ պատրաստվում նրան պատասխանել նույն կերպ։ Ավստրալիան ուրախությամբ կաշխատի Ֆրանսիայի հետ փոխադարձ հետաքրքրություն ներկայացնող նախագծերի շուրջ։ Պարզ է, որ [ֆրանսիական կողմի] վիրավորվածությունը դեռեւս ուժեղ է, բայց մենք կսպասենք, մինչեւ որ այն անցնի։ Մենք շատ նախագծեր ունենք, որոնց ուղղությամբ պետք է աշխատել, եւ մենք շահագրգռված ենք մնում Ֆրանսիայի հետ մեր գործընկերության հարցում»,- ասել է Մորիսոնը։

Վարչապետը նշել է, որ դժվար որոշումները, որոնք ընդունել է ինքը Ավստրալիայի պաշտպանունակության ապահովման համար, բոլորին չէ, որ դուր են գալիս եւ բոլորին չէ, որ «երջանիկ են դարձնում»։ «Մենք պետք է ուժ ունենանք, որպեսզի հաշտվենք վիրավորանքի հետ, որը դրանք [որոշումները] կարող են առաջացնել, ուժ, որպեսզի հաղթահարենք այն։ Ես միանգամայն համոզված եմ, որ իմ ընդունած որոշումը [սուզանավերի կառուցման գործարքը խզելու մասին] ճիշտ է, համապատասխանում է Ավստրալիայի շահերին եւ կծառայի Հնդկա-խաղաղօվկիանոսյան տարածաշրջանի անվտանգության ապահովմանը»,- ընդգծել է նա։

Կառավարության ղեկավարի հայտարարությունը հնչել է Ֆրանսիայի նախագահի հայտարարությունից հետո, որը Մորիսոնին մեղադրում էր խաբեության մեջ անվտանգության ոլորտում նոր AUKUS գործընկերության հետ կապված։ «Ես չեմ կարծում, ես գիտեմ դա»,- պատասխել է Մակրոնը ավստրալացի լրագրողի հարցին, թե արդյոք նախագահը կարծում է, թե Ավստրալիայի վարչապետը ստել է իրեն։ Ավելի վաղ Մակրոնը Մորիսոնի հետ հեռախոսազրույցում նշել էր, որ Կանբերայի միակողմանի որոշումը՝ հրաժարվել գործարքից հօգուտ մեկ այլ նախագծի, «խափանել է վստահության հարաբերությունները երկու երկրների միջեւ»։ Մակրոնի կարծիքով՝ Ավստրալիան պետք է «առաջարկի կոնկրետ գործողություններ, որոնցում կմարմնավորվեր իշխանությունների կամքը՝ վերանայելու երկկողմ հարաբերությունները եւ շարունակելու համատեղ գործողությունները Հնդկա-խաղաղօվկիանոսյան տարածաշրջանում»։

Վաշինգտոնը, Լոնդոնը եւ Կանբերան սեպտեմբերի 15-ին հայտարարել են անվտանգության ոլորտում նոր գործընկերության՝ AUKUS-ի ստեղծման մասին։ Կանբերան այս համատեքստում խզել է պատմության մեջ ամենախոշոր՝ ավելի քան 50 մլրդ եվրո արժողությամբ պաշտպանական գործարքը Փարիզի հետ սուզանավերի մատակարարման վերաբերյալ։ Դաշնակիցների այս անդրկուլիսային գործողությունները Փարիզում անվանել են «հարված թիկունքին»։