Վիրջինիան դարձել է մահապատիժը վերացրած հարավային առաջին նահանգը ԱՄՆ-ում
Երկուշաբթի ԱՄՆ Վիրջինիա նահանգում մահապատժի վերացման օրինագիծը վերջապես հաստատվեց տեղական օրենսդիրների կողմից եւ ստորագրության համար ուղարկվեց դեմոկրատ նահանգապետ Ռալֆ Նորթհեմին, ով մտադիր է այն ստորագրել: Այսպիսով, այն առաջին նահանգը կդառնա Միացյալ Նահանգների հարավում, որտեղ պատժի այս տեսակը կվերացվի օրենսդրական մակարդակով, հայտնում է ՏԱՍՍ-ը` վկայակոչելով The Washington Post-ը:
Վիրջինիան կդառնա մահապատիժը վերացրած 23-րդ նահանգը: Մահապատիժը կփոխարինվի ցմահ ազատազրկմամբ` առանց պայմանական վաղաժամկետ ազատման:
Ըստ պարբերականի` այս նահանգը մինչ այժմ առաջատարն էր իր տարածքում մահապատժի ենթարկվածների թվով: Այդպես, Վիրջինիա նահանգի գոյության ընթացքում, որը նախ անգլիական գաղութ էր, ապա` ԱՄՆ-ի կազմում գտնվող պետություն, դրա իշխանությունները գրեթե 1.4 հազար մարդու են մահապատժի ենթարկել: Առաջին մահապատիժը տեղի է ունեցել 1608 թվականին, երբ Ջեյմսթաունում, որը առաջին անգլիացիների առաջին բնակավայրն էր ժամանակակից Միացյալ Նահանգների տարածքում, իսպանացի լրտես համարվող մի մարդու մահապատժի ենթարկեցին:
«Վիրջինիայի երկար պատմության ընթացքում այս նահանգն ավելի շատ մարդկ է մահապատժի ենթարկել, քան ցանկացած այլ նահանգ: Ժամանակն է դադարեցնել սպանության այս մեքենան»,- համատեղ հայտարարության մեջ նշել են նահանգապետ Նորթհեմը, Սենատում մեծամասնության ղեկավար Ռիչարդ Սեսլոուն եւ նահանգի ներկայացուցիչների պալատի դեմոկրատ խոսնակ Էյլին Ֆիլեր-Քորնը:
Դեկտեմբերին ԱՄՆ Կոնգրեսի մի քանի տասնյակ անդամ կոչ էր արել ԱՄՆ ներկայիս նախագահ Ջո Բայդենին, ով իր նախընտրական արշավի ընթացքում խոստացել էր վերացնել մահապատիժը դաշնային մակարդակում, հասնել դրա վերացմանը նահանգների մակարդակով:
2019-ին` հանրապետական Դոնալդ Թրամփի նախագահության օրոք, այն ժամանակ արդարադատության նախարար եւ ԱՄՆ գլխավոր դատախազ Ուիլյամ Բարը վերսկսել էր մահապատժի պրակտիկան դաշնային մակարդակում դատապարտված հանցագործների համար:
Անցյալ տարի Ամերիկայի պատմության մեջ առաջին անգամ մեկ տարվա ընթացքում դաշնային մահապատիժների թիվը գերազանցել էր բոլոր նահանգների ընդհանուր ցուցանիշը: