Որտեղ է բնակվել Նավալնին «Գելենջիկի պալատի» մասին նկարահանումների ժամանակ. «Ռոսիա 1»-ի թղթակիցը մանրամասներ է ներկայացրել Գերմանիայից (լուսանկարներ)

«Ռոսիա 1» հեռուստաալիքի լրագրողները մեկնել են Գերմանիայի Ֆրայբուրգ քաղաք և գտել այն տունը, որտեղ ապրել է ռուս ընդդիմադիր գործիչ Ալեքսեյ Նավալնին՝ Գելենջիկի պալատի մասին ֆիլմի նկարահանումներն իրականացնելու ժամանակ: Այս մասին գրում է fontaka.ru-ն, նշելով՝ ընդհանուր առմամբ Նավալնին ողջ ընթացքում ծախսել է մոտ մեկ միլիոն եվրո:

Գերմանական քաղաքում գտնվող այս տունն օրերս ցուցադրվել է ՌԴ պետական հեռուստատեսությամբ: Թղթակից Անաստասիա Պոպովան նախ այցելել է Black forest ստուդիա, որտեղ նրանք նկարահանել և մոնտաժել են Հակակոռուպցիոն հիմնադրամի կողմից ներկայացված հետազոտական ֆիլմը: Ըստ լրատվամիջոցի՝ ստուդիան պատվերը ստացել է ԱՄՆ-ից, և նկարահանումները Նավալնի համար արժեցել են գրեթե մեկ միլիոն եվրո՝ չհաշված սննդի և հարակից ծախսերը:

Հեռուստաընկերության թղթակիցը ռեպորտաժում մանրամասն ներկայացրել է, թե ինչ տեսք ունի շինությունը ներսից: Մասնավորապես, նշվում է՝ տան առաջին հարկն ավելի քան 100 քառակուսի մետր տարածք է ընդգրկում: Այստեղ ընդարձակ հյուրասենյակ կա, երկու բազմոց, հեռուստացույց և սեղան:

Հաջորդիվ լրագրողը «գնահատել է» տան սանհանգույցը, որը, ըստ նրա «չի փայլել մաքրությամբ»:

Այնուհետև Պոպովան ռեպորտաժում ցույց է տվել, թե ինչ տեսք ունի տան ջակուզին: Նրա խոսքով՝ այն «սովորական լոգարանակոնք է հիշեցնում»:

Բացի այդ, թղթակիցը հասցրել է օգտվել նաև լողավազանից: Պոպովան այս առնչությամբ նշել է՝ «հիվանդն այս դեպքում իրեն որևէ բանից չի զրկել. լողավազանն ունի 10 մետր բարձրություն և 5 մետր լայնություն»:

Ինչ վերաբերում է տան երկրորդ հարկին, ապա այստեղ, ըստ լրագրողի, ուշագրավ է այն, որ բոլոր պահարանները ծածկված են փափուկ գործվածքով, և կողպեքներն ունեն «հեքիաթային ոսկե բանալիներ», որը «60-ականների ֆրանսիական ոճ է հիշեցնում»:

Պոպովայի տեղեկություններով՝ առանձնատանը մեկ օր բնակվելն արժե 530 եվրո, իսկ Նավալնին այնտեղ է ապրել գրեթե երկու ամիս:Ամեն դեպքում սա այն գինն է, որն առաջարկվում Booking ծառայության կողմից:

Հիշեցնենք՝ Ալեքսեյ Նավալնիի աջակիցները հունվարի 19-ին նոր հետազոտական ֆիլմ էին ներկայացրել Գելենջիկում գտնվող «պալատ»-ի մասին՝ պնդելով, որ ավելի քան 17 հազար քառակուսի մետր ընդգրկող տունը կառուցվում է Ռուսաստանի Դաշնության նախագահ Վլադիմիր Պուտինի համար: Այնուամենայնիվ, ՌԴ ղեկավարի մամուլի քարտուղար Դմիտրի Պեսկովն այս առնչությամբ հայտնել էր՝ ո՛չ Պուտինը, ո՛չ էլ նրա հարազատները երբևէ որևէ առնչություն չեն ունեցել շինության հետ:

Պաշտոնյայի հայտարարությունից օրեր անց ռուս միլիարդատեր Արկադի Ռոտենբերգը հայտարարությամբ էր հանդես եկել ու նշել՝ կառուցվող տան տերն իրականում ինքն է, ու որ այն նախատեսված է հետագայում որպես հյուրանոց օգտագործելու համար: