ԱՄՆ-ն գործընկեր պետությունների, այդ թվում՝ Հայաստանի համար «էներգետիկ անվտանգությանը» առնչվող նոր նախագիծ է նախաձեռնել

Ամերիկայի Միացյալ Նահանգների միջազգային զարգացման գործակալությունը (USAID) նախատեսում է մի շարք գործընկեր երկրներում գործարկել ծրագիր, որը վերաբերում է «տարածաշրջանային էներգիայի մատակարարման անվտանգության, հուսալիության և արդյունավետության բարելավմանը»: Այս մասին գրում է RT-ն, որի տրամադրության տակ է հայտնվել այն փաստաթուղթը, որում ներկայացված են ծրագրի վերաբերյալ որոշ մանրամասներ:

Նշվում է՝ «Ներդրումներ էներգետիկ ակտիվների զարգացման գործում» ծրագրի շրջանակներում նախատեսվում է ներդրումներ իրականացնել էներգետիկայի բոլոր ոլորտներում, այդ թվում՝ «ջերմության և էլեկտրաէներգիայի արտադրության օբյեկտներում, էլեկտրաէներգիայի փոխանցման և բաշխման ցանցերում, ջրամատակարարման և ջրահեռացման ենթակառուցվածքներում»: Առաջարկվում է նաև հատուկ ուշադրություն դարձնել ենթակառուցվածքային առաջարկներին, որոնք զգալի ներդրումներ են պահանջում:

Բացի այդ, ըստ ծրագրի՝ կապալառուները պետք է որոշեն էներգետիկ ոլորտում ներդրումային նախագծերի ծավալը հետևյալ երկրներում ՝ Ադրբեջան, Ալբանիա, Հայաստան, Բոսնիա և Հերցեգովինա, Վրաստան, Կոսովո, Մոլդովա, Հյուսիսային Մակեդոնիա, Սերբիա և Ուկրաինա:

Շեշտվում է նաև, որ այս ծրագիրը պետք է օգնի ամերիկյան բիզնեսի և տեխնոլոգիաների համար շուկաների բացման գործում:

«Գործողությունները պետք է ուղղակիորեն կամ անուղղակիորեն աջակցեն գործակալության նպատակներին՝ նվազեցնելով կախվածությունն էներգետիկ ռեսուրսների ներկրումից, դրանով իսկ սահմանափակելով օտարերկրյա կառավարությունների կամ այլ դերակատարների վնասակար ազդեցությունը ներքին գործերին, ինչպես նաև ավելացնելով ազգային ինքնաբավությունը և դրական ազդեցություն ունենալով էներգիայի մատակարարման անվտանգության վրա», - ասվում է փաստաթղթում:

Միևնույն ժամանակ, USAID-ում նշել են, որ եվրոպական և եվրասիական տարածաշրջանների գործընկեր երկրները Ռուսաստանից հիմնականում կախվածություն ունեն այն դեպքում, երբ խոսքը վերաբերում է նավթի և գազի ներկրմանը:

«Հետևաբար, այդ պետությունների էներգետիկ ոլորտում կատարվելիք ներդրումները, ըստ ամերիկացի փորձագետների, ուղղակիորեն կազդեն մատակարարումների անվտանգության և հուսալիության բարձրացման վրա, ինչպես նաև կնվազեցնեն քաղաքական միջամտությունների նկատմամբ խոցելիությունը»,- հստակեցրել են գործակալությունից:

Հիշեցնենք՝ 2020 թվականին Միացյալ Նահանգները հայտարարել էր Եվրամիության և գործընկեր պետությունների միջև համագործակցության ընդլայնման ծրագրերի մասին՝ եվրոպական շուկայում Ռուսաստանի դիրքերը թուլացնելու և վառելիքի մատակարարումները դիվերսիֆիկացնելու համար:

Բացի այդ, ԱՄՆ Պետդեպարտամենտը հայտնել էր, որ իրենք վերահսկելու են «Հյուսիսային հոսք 2» գազատարի շինարարության ավարտը, և անհրաժեշտության դեպքում, կքննարկեն պատժամիջոցների կիրառման հարցը: