«Ինքն իր ընտանիքի անդամի քայլերը չի կարողանում կանխի, ընկել է մեր հետևի՞ց, մարդ է ձերբակալում». Գևորգ Պետրոսյան

«Էսօր որոշ շառլատաններ, գուցե և անգիտակացաբար, բայց շատերը՝ նաև գիտակցաբար, մեզ ասում են` դուք պաշտոնակռվի եք դուրս եկել. արա, ա՛յ տղա, ես պաշտոն ունեմ էսօր»,- լրագրողների հետ հանդիպման ժամանակ հայտարարեց ԱԺ «Բարգավաճ Հայաստան» խմբակցության պատգամավոր Գևորգ Պետրոսյանը՝ հիշեցնելով, որ ԱԺ պատգամավորի պաշտոնը «Հանրային ծառայության մասին» ՀՀ օրենքի համաձայն, համարվում է բարձրաստիճան պետական քաղաքական պաշտոն:

Նա նշեց, որ, թեև ինքն այսօր պաշտոն ունի, բայց խոսում է ԱԺ-ն ցրելու անհրաժեշտության մասին, քանի որ կարծում է՝ էյֆորիայից ազատված հասարակությունն ավելի օբյեկտիվ ընտրություն կկատարի. «Ես այսօր պաշտոն ունեմ, ասում եմ՝ եկեք ցրենք ԱԺ-ն: Ե՞ս եմ պաշտոնակռվի դուրս եկել, կամ ինձ նման ընդդիմության մյուս պատգամավորնե՞րը:

Եթե մեզ այսօր հետաքրքրեր մեր պաշտոնը, մեր փափուկ կյանքը, կասեինք՝ այ մարդ, գործ չունենք, ձեն չհանենք, մեզ համար սուսուփուս նստենք. աշխատավարձ ստանում ենք, խրախուսում ստանում ենք… Ամո՛թ է նման մեղադրանք հնչեցնելը: Սա մանիպուլյացիա է, այ իրենք, որ մեկ-մեկ ասում են՝ դուք մանիպուլյացիա եք անում, հիմա իրենք դասական մանիպուլյացիայի վրա են նստած ամեն օր:

Մենք հակառակը՝ ասում ենք՝ եկեք այս ԱԺ-ն ցրենք, նոր ընտրություններ նշանակենք, թող նոր ընտրություններով ժողովուրդն արդեն էյֆորիայից դուրս եկած վիճակում ավելի օբյեկտիվ ընտրություն կատարի»:

Հարցին՝ արդյոք այս իշխանությանն արժե՞ սահմանադրությամբ, օրենքով ինչ-որ բան բացատրել, պատգամավորը պատասխանեց. «Եթե մենք այլ բան անենք, օրենքները խախտելով գնանք, մենք, ստացվում է, որ հավասարվում ենք Նիկոլ Փաշինյանին,- ապա հավելեց,- Նիկոլ Փաշինյանը, եթե բարոյականություն ունենար, պետք է նախ՝ չստորագրեր, պետք է ժողովրդի հետ ազնիվ լիներ, իր տակ պառկած և աշխատող լրատվամիջոցները անընդհատ չասեին՝ հաղթում ենք, հես ա կտեսնեք՝ Գետաշենն ենք գրավել, Շահումյանը… խաբելով տարան-տարան, վերջում կանգնեց-ասեց՝ ինձ վրա մեղք չդնեք, դուք եք մեղավոր: Իր սովորության համաձայն՝ բոլոր պարտությունները վերագրում է ընդդիմությանը, իր հետ կապ չունեցող հաջողությունները վերագրում է իրեն. սա է իր ոճը»:

Անդրադառնալով Հայաստանի պաշտպանության նախարարության ռազմական վերահսկողական ծառայության նախկին պետ, ՀՀ ԶՈւ գլխավոր շտաբի նախկին պետ Մովսես Հակոբյանի նկարագրած հայտնի դրվագին, ըստ որի՝ ՀՀ վարչապետի տիկին Աննա Հակոբյանը եղել էր հրամկետում, Գևորգ Պետրոսյանը ասաց. «Նախ՝ իր ընտանիքի անդամներն ի՞նչ գործ ունեին՝ գնային էնտեղ, գեներալներին նեղացնեին, հանձնարարություններ տային: Իրենք հաստատ ռազմական գործի հետ կապված որևէ անելիք չունեին այնտեղ, էդ ո՞վ պիտի դա կանխեր, ինքը: Ինքն իր ընտանիքի անդամի քայլերը չի կարողանում կանխի, ընկել է մեր հետևի՞ց, մարդ է ձերբակալում:

Հիմա ես չեմ ուզում ինչ-որ քաղաքական շահի տպավորություն թողնի իմ ասածը, բայց արա ընկե՛ր ջան, դու բան ու գործ չունե՞ս, էսօր ընկել ես Ծառուկյանի մանդատի հետևից, ՀՀ թիվ մեկ հարցը Ծառուկյանին մանդատից զրկելն է՞. բա էսպես կարելի՞ է թքած ունենալ գերակայությունների վրա»:

Պատգամավորն ակնկալում է, որ վարչապետն ասուլիսով կներկայացնի ռազմագերիներին վերադարձնելուն ուղղված իր քայլերը՝ հաշվի առնելով այս օրերին տարածվող դաժան տեսարանները և լուրերը. «Դուք գիտե՞ք երեկ ինչ է իմ ականջին հասել. իհարկե, օդում կախված լուրերի համաձայն, որ մեր ռազմագերիներին (չգիտեմ, Տա Աստված` սուտ լինի, ես սա որպես փաստ չեմ հնչեցնում, երեկվանից ես ամբողջ գիշեր չեմ քնել) պատրաստվում են ուղարկել Իսրայել, թե որտեղ, որպեսզի փոխպատվաստումներ անեն, օրգաններ հանեն, հասկանո՞ւմ եք՝ ինչ է կատարվում»:

Դիտարկմանը, թե դրանից հետո իրեն բա՞ն եք բացատրում, նա արձագանքեց. «Էթամ-խփեմ, եթե չխփեմ, ամոթ լինի ինձ: Բայց ինձ չեն հասկանա՝ կասեն՝ դու հեղափոխությամբ եկածին գնացիր-վերացրիր»:

Անդրադառնալով ուժային համակարգին՝ Գևորգ Պետրոսյանը նշեց, որ, թեև մեծագույն հարգանք ունի նրանց հանդեպ, այդուհանդերձ չի կարող հասկանալ, թե ոստիկանը ինչպես է ապօրինի հրահանգով ոչ համաչափ ուժով բերման ենթարկում քաղաքացիներին. «Նա ինչո՞վ է տարբերվում թուրքից, հո մենակ անձնագրով չի՞: Իհարկե, կա հրամանի կատարման ինստիտուտ, բայց կա նաև ակնհայտ ապօրինի հրաման չկատարելու քո իրավունքը:

էս ո՞ւր են հասցրել պետական ծառայությունը. էսօր ԱԱԾ-ն, եթե իր դիրքերում լիներ, շատ շուտ կիմանայինք, թե մեզ ինչ է սպասում: Ինքն էլ թող ազնիվ լիներ ժողովրդի հետ. էդ որ կանգնում-ասում է՝ ժողովուրդն է երկիրը, արա բա մի հատ գայիր, ժողովրդի կարծիքը հարցնեիր՝ էդ ռեսուրսներով դու կարող ե՞ ս…»:

Դիմելով վարչապետին՝ պատգամավորը հարցրեց. «Եթե դու էդքան դուխով տղա ես, կարող ե՞ս Երևանի ցանկացած կետում առանց թիկնազորի ման գաս, գիտե՞ս քեզ ինչ կանեն և ճի՛շտ կանեն, որովհետև դու գլխակեր ես, դու կերար 5 հազարից ավել երեխու գլուխ, հաշմանդամություն պատճառեցիր մոտ 10 հազարին, էլ չասած, որ հողերը, մեր հայրենիքը զիջեցիր (հողեր, որ ասում ենք, չեմ ընդունում. հողամաս չի, որ վրան տանձի ծառ լինի, դու էլ զիջես, նա հայրենիքն է զիջել): Եվ էդքանից հետո՝ անամոթաբար ոչ միայն հրաժարական չի տալիս, այլև ինչ-որ կադրային փոփոխություններ է անում, աննորմալ նշանակումներ, որ ոչ մի տրամաբանություն չկա դրանց մեջ:

Փոխանակ ինքն ասեր՝ այո, ժողովո՛ւրդ, ես ընդունում եմ, որ սխալվել եմ, որ ապիկար եմ եղել, խնդրո՛ւմ եմ ինձ ներեք, հենց միայն նրա համար, որ ես ձեզ ազատագրեցի նախկին իշխանություններից, բայց էսօր էդ մարդը մի հատ էլ վեր է կենում, հաթաթա է տալիս… Թող մյուս անգամ գա ԱԺ էդ ինտոնացիայով խոսի, տես իրեն ինչ է սպասվում…

Գնում, սրա-նրա առաջ կռանում է, խոնարհվում է… Ալիևի նման փալասը, որին իր ընտանեկան կերպարի պատճառով ամբողջ աշխարհը ծաղրում է, էսօր իր վրա ծիծաղում է:

Բա Փաշինյա՛ն, եթե Ալիևը քո վրա ծիծաղում է, երգ են հնարել իր վրա (ես ամաչեցի այդ երգը լսել), ասում են, որ ինչ-որ նախաձեռնություն էլ կա, որ իրեն ճանաչեն Ադրբեջանի հերոս, դու էս պայմաններում, ընկեր ջան, ի՞նչ ես գնալու բանակցես:

Դրա համար, եթե արժանապատվություն մնացել է, Փաշինյա՛ն, մեջդ, հրաժարական տուր, ամոթ է, դու ուզում ես երկրորդ Մարտի մե՞կ անես, բայց ես վստահ եմ, որ չի՛ լինելու: Դու քո իշխանությունը պահելու համար ներքին ցեղասպանություն մի՛ իրականացրու, որովհետև արդեն Թուրքիան արտաքին ցեղասպանությունը երկրորդ անգամ սկսել է»:

Գևորգ Պետրոսյանն անդրադարձավ նաև Սոթքի հայտնի միջադեպին. «Երեկ գիշերը արդեն Վարդենիս է հասել թուրքը, հիմա ի՞նչ անենք. գա Երևան հասնի, մենք էլ բոլորս ավտոմատները առնենք…Կամ ասենք՝ թուրքը, որ եկել է, Նիկո՛լ Փաշինյան, դու քո ազգային անվտանգությունը փոխանակ աշխատեցնես նպատակային նշանակության, բա ո՞ւր էր էդ Ազգային անվտանգությունը, որ չի հաղորդել՝ թուրքը հասել է Սոթքին արդեն, որովհետև իրենն ազգային անվտանգություն չի, դա իր անձնական անվտանգությունն է»:

Հարցին, իսկ գուցե ինքը գիտի՞, որ պետք է գան, նա պատասխանեց. «Դե, եթե ինքը գիտեր, ուրեմն ինքը պետական դավաճան է, ես ուրիշ պիտակ չունեմ իրեն կպցնելու»: