ԱԺ պատգամավորներ Է. Վարդանյանի, Վ. Հովհաննիսյանի եւ Ս. Մարգարյանի հեղինակած օրինագիծը մտել է ԱԺ օրակարգ

ՀՀ ԱԺ պետական-իրավական հարցերի մշտական հանձնաժողովի նիստում Հովհաննես Սահակյանի նախագահությամբ փետրվարի 3-ին առաջին ընթերցումով քննարկվել է «Էլեկտրոնային փաստաթղթի եւ էլեկտրոնային թվային ստորագրության մասին» ՀՀ օրենքում փոփոխություն եւ լրացումներ կատարելու մասին» օրենքի նախագիծը, որը ներկայացրել է «Օրենսդրության կարգավորման ազգային կենտրոն» հիմնադրամի տնօրեն Արմեն Եղիազարյանը: Նշվել է, որ օրինագծով կհստակեցվի, թե ինչպես է ակտիվացվում էլեկտրոնային թվային ստորագրությունը, սահմանված կլինի, թե նույնականացման քարտ չունեցող անձինք ինչպես են ստանալու էլեկտրոնային թվային ստորագրության հավաստագիր, հստակ կլինի էլեկտրոնային թվային ստորագրության հավաստագրի գործողության ժամկետը, հստակ կլինեն հավաստագրի դադարեցման, կասեցման հիմքերը:
Առաջին ընթերցումով քննարկվել է նաեւ «ՀՀ քաղաքացիական օրենսգրքում փոփոխություններ եւ լրացումներ կատարելու մասին» օրինագիծը: Հիմնական զեկուցող, ՀՀ արդարադատության նախարարի առաջին տեղակալ Արթուր Հովհաննիսյանը նշել է, որ նախագծի ընդունումը պայմանավորված է ՀՀ քաղաքացիական օրենսգրքում գույքի սեփականատեր չհանդիսացող անձի՝ գույքային իրավունքի առանձնահատուկ տեսակի՝ անձնական սերվիտուտի, ներառյալ ուզուֆրուկտի ինստիտուտի ներդրման անհրաժեշտությամբ: ՀՀ քաղաքացիական օրենսգրքում կներդրվի հստակ ձեւակերպված «անձնական» սերվիտուտի ինստիտուտը: Արդյունքում սերվիտուտ հնարավոր կլինի սահմանել ոչ միայն անձի կողմից իր տիրապետման տակ գտնվող անշարժ գույքի (հողամասի) օգտագործման անհրաժեշտությամբ պայմանավորված, այլ կոնկրետ անձով, նրա կարգավիճակով, ծավալած գործունեությամբ:
Հարակից զեկույցում հանձնաժողովի անդամ Լեւոն Մարտիրոսյանը ողջունել է գործադիրի կողմից առաջարկված փոփոխությունները, որից հետո հանձնաժողովն օրինագծերն ԱԺ գարնանային նստաշրջանի եւ առաջիկա քառօրյա նիստերի օրակարգերի նախագծերում ընդգրկելու վերաբերյալ դրական եզրակացություն է տվել:
ԱԺ պատգամավորներ Էլինար Վարդանյանի, Վահե Հովհաննիսյանի եւ Ստեփան Մարգարյանի հեղինակած «Վարչական իրավախախտումների վերաբերյալ ՀՀ օրենսգրքում փոփոխություն կատարելու մասին» օրինագիծը եւս քննարկվել է առաջին ընթերցումով: Էլինար Վարդանյանը նշել է, որ հաշվի առնելով «Ավտոտրանսպորտային միջոցների կայանատեղերի տեղական տուրքի մասին» օրենքով սահմանված իրավախախտման եւ պատասխանատվության ակնհայտ անհամաչափությունը՝ նախագծով առաջարկվում է կայանելու մեկ ժամվա համար չվճարած 100 դրամ տուրքի համար սահմանել տուգանք նվազագույն աշխատավարձի չափով, ինչը համարժեք է ավտոկայանատեղի մեկ շաբաթվա դրույքաչափին: Գործող օրենսդրությամբ մեկ ժամվա համար սահմանված 100 դրամը չմուծելու դեպքում սահմանված է 5000 դրամ տուգանք, ինչն ավելին է քան երկու ամսվա համար նախատեսված ավտոկայանատեղի տուրքը:
ՀՀ արդարադատության նախարար Արփինե Հովհաննիսյանը նշել է, որ կառավարությունն սկզբունքորեն դեմ չէ առաջարկվող գաղափարին, սակայն առարկություններ ունի սահմանված տուրքի չափի մասով: Նա առաջարկել է հիմնական զեկուցողներին համատեղ աշխատել գաղափարի շուրջ եւ համաձայնության գալ:
Քննարկումների արդյունքում օրինագիծն ստացել է հանձնաժողովի դրական եզրակացությունը եւ կընդգրկվի ԱԺ նստաշրջանի օրակարգի նախագծում:
Այնուհետեւ ԱԺ պատգամավոր Նիկոլ Փաշինյանը ներկայացրել է «Բարձրաստիճան պաշտոնատար անձանց եւ նրանց հետ փոխկապակցված անձանց եկամուտների ձեւավորման աղբյուրները եւ գույքային վիճակն ուսումնասիրող ՀՀ ԱԺ ժամանակավոր հանձնաժողով ստեղծելու մասին» ԱԺ որոշման նախագիծը: Հանձնաժողովը պետք է ուսումնասիրի բարձրաստիճան պաշտոնատար անձանց եւ բարձրաստիճան պաշտոնատար անձանց հետ փոխկապակցված անձանց գույքի եւ եկամուտների ձեւավորման աղբյուրները, ինչպես նաեւ նրանց գույքային վիճակը, դրամական միջոցների եւ գույքի աղբյուրների օրինականությունը, նրանց դրամական միջոցների եւ գույքի ձեւավորման հետ կապված հնարավոր կոռուպցիոն երեւույթները:
ՀՀ արդարադատության նախարար Արփինե Հովհաննիսյանը տեղեկատվություն է տրամադրել վերոնշյալ խնդիրը կանոնակարգող օրենսդրական այն նախաձեռնությունների վերաբերյալ, որոնք առաջիկայում կներկայացվեն կառավարության կողմից, խոսել է ինստիտուցիոնալ բարեփոխումների մասին:
Հանձնաժողովի նախագահ Հովհաննես Սահակյանն իր ելույթում անդրադարձել է նախագծի սահմանադրական, իրավական եւ քաղաքական խնդիրներին:
ԱԺ որոշման նախագիծը չի արժանացել հանձնաժողովի դրական եզրակացությանը:
ՀՀ արդարադատության նախարար Արփինե Հովհաննիսյանը ներկայացրել է «ՀՀ քրեական օրենսգրքում փոփոխություն կատարելու մասին» օրինագիծը եւ «ՀՀ քրեական օրենսգրքում փոփոխություն եւ լրացումներ կատարելու եւ ՀՀ քրեական օրենսգրքում փոփոխություններ եւ լրացում կատարելու մասին» ՀՀ 2016 թվականի մայիսի 17-ի ՀՕ-49-Ն օրենքի 1-ին հոդվածը չեղյալ ճանաչելու մասին», «ՀՀ քրեակատարողական օրենսգրքում փոփոխություններ եւ լրացումներ կատարելու մասին» եւ «ՀՀ քրեական դատավարության օրենսգրքում լրացում կատարելու մասին» օրենսդրական փաթեթը:
«ՀՀ քրեական օրենսգրքում փոփոխություն կատարելու մասին» օրինագծի ընդունմամբ կհստակեցվի ՀՀ քրեական օրենսգրքի 205-րդ հոդվածի օրենսդրական ձեւակերպումը եւ կապահովվի գործնականում դրա արդյունավետ կիրառությունը: Արդյունքում՝ կսահմանափակվի վարչական վարույթին վերաբերող գործերը քրեաիրավական հարթություն տեղափոխելու հնարավորությունը:
Հաջորդ օրենսդրական առաջարկով էլ կապահովվի պատժից պայմանական վաղաժամկետ ազատման ինստիտուտի կիրառման արդյունավետության բարձրացումը: Կհստակեցվեն պատիժը կիրառող հիմնարկի վարչակազմի եւ անկախ հանձնաժողովի գործառույթները՝ բացառելով նույնաբնույթ գործառույթների իրականացումը, կսահմանվեն հստակ չափանիշներ, որոնք կդրվեն եւ՛ անկախ հանձնաժողովի, եւ՛ դատարանի պատճառաբանված որոշումների հիմքում, դատապարտյալն իրավունք կունենա մասնակցելու իրեն վերաբերող որոշումների կայացմանը եւ իրականացնելու համապատասխան պաշտպանություն, այդ թվում՝ բողոքարկելով անկախ հանձնաժողովի որոշումները:
Երկրորդ ընթերցմամբ քննարկվել են «ՀՀ քաղաքացիական օրենսգրքում փոփոխություն կատարելու մասին» օրենքի նախագիծը, «ՀՀ քաղաքացիության մասին» ՀՀ օրենքում փոփոխություն կատարելու մասին» եւ «Վարչական իրավախախտումների վերաբերյալ ՀՀ օրենսգրքում փոփոխություն կատարելու մասին», «Վարչական իրավախախտումների վերաբերյալ ՀՀ օրենսգրքում լրացումներ կատարելու մասին», «ՀՀ քրեական օրենսգրքում լրացումներ կատարելու մասին», «ՀՀ քրեական դատավարության օրենսգրքում լրացում կատարելու մասին», «Հանրային ծառայության մասին» ՀՀ օրենքում փոփոխություն եւ լրացումներ կատարելու մասին» եւ «Դատախազության մասին» ՀՀ օրենքում փոփոխություն կատարելու մասին» օրենսդրական փաթեթները, որոնք արժանացել են հանձնաժողովի դրական եզրակացությանը՝ ԱԺ հերթական քառօրյա նիստերի օրակարգի նախագծում ընդգրկելու համար:
«ՀՀ քրեական օրենսգրքում փոփոխություններ կատարելու մասին» ՀՀ ԱԺ պատգամավորներ Արտակ Դավթյանի, Կարինե Աճեմյանի եւ Մկրտիչ Մինասյանի ներկայացրած օրենքի նախագծի քննարկումը հետաձգվել է մինչեւ մեկ տարի ժամկետով: