«Այս պահին փոխնախագահը այսօր երեկոյան չի մեկնում։ Մենք ձեզ կտեղեկացնենք, հենց որ ունենանք հաջորդ քայլի վերաբերյալ հստակ տեղեկություն»,- ասվում է Սպիտակ տան ներկայացուցչի հայտարարության մեջ։

Նախագահի վարչակազմում հավելել են. «Մենք անհամբեր սպասում ենք հնարավորինս շուտ տեխնիկական բանակցությունների մեկնարկին»։

Միաժամանակ նշվում է, որ առաջիկա տեխնիկական բանակցությունների ծրագրերը դեռևս համաձայնեցված չեն, և ԱՄՆ պատվիրակությունը պատրաստ է մեկնել առաջին իսկ հնարավորության դեպքում։

«Սակայն այդ բանակցությունների լոգիստիկան երբեք էլ պարզ կամ կանխատեսելի չի եղել»,- նշվում է հայտարարության մեջ։

Այս շաբաթ Իրանի և ԱՄՆ-ի կողմից ստորագրված փոխըմբռնման հուշագրի համաձայն՝ երկու կողմերը նախատեսում են 60 օր տևողությամբ տեխնիկական բանակցություններ անցկացնել Իրանի միջուկային ծրագրի ճակատագրի շուրջ։

Նախօրեին Վենսը հաստատել էր, որ մտադիր է մեկնել Շվեյցարիա՝ Իրանի հետ բանակցությունների, սակայն միևնույն ժամանակ ընդգծել էր, որ դեռ հստակ չգիտի, թե կոնկրետ երբ կհայտնվի այնտեղ, քանի որ դա կախված է նրանից, թե երբ այդ երկիր կհասնեն իրանցի բանակցողները։