Սայթաքել, թե՞ ընկնել փոսը. այլընտրանք Մալաթիա-Սեբաստիա վարչական շրջանի բնակիչների համար

Արդեն մեկ շաբաթից ավել է, ինչ Երեւանի Մալաթիա-Սեբաստիա վարչական շրջանի բնակիչների խնդիրներին ավելացել է մայթին առաջացած խորաբաց փոսը:

«Պորտալը» ձեւավորվել է Անդրանիկի փողոցի մայթի մեջտեղում՝ կրպակների եւ հասարակական տրանսպորտի կանգառի անմիջական հարեւանությամբ:

Որպեսզի քաղաքացիները փոսը չընկնեն, հոգատար մարդիկ դրա շուրջը քարեր են շարել: Սկզբում հայտնվեց մեկը, հետո՝ երկրորդը։ Հիմա մտախոհ անցորդներն այլընտրանք ունեն՝ կամ փոսն ընկնել, կամ սայթաքել քարի վրա։ Փոսի խորությունն ու լայնությունն այնպիսին են, որ կոտրվածքն ապահովված է:

Փոսից մի քանի տասնյակ սանտիմետր հեռավորության վրա երեւում է «Արմենթել» գրությամբ լյուկը։ Ակնհայտ է, որ այնտեղով հաղորդակցություններ են անցնում, եւ փոսն ուղիղ կերպով կապված է լյուկի հետ, եւ թեեւ դրա անվանումը հնացել է, կարելի է ենթադրել, որ հաղորդակցությունները, այնուամենայնիվ, օգտագործվում են կապի օպերատորներից մեկի կողմից:

Եւ քանի դեռ ոչ ոք չի տուժել, թաղապետարանին կոչ ենք անում զբաղվել անճոռնի եւ մարդկանց առողջության համար վտանգավոր խնդրի վերացմամբ։