Կպղծեն Գուրգեն Մարգարյանի անունը

15 տարի առաջ, 2004-ի փետրվարի 19-ին Բուդապեշտում դաժանաբար սպանվել է ՀՀ ԶՈւ լեյտենանտ Գուրգեն Մարգարյանը: Նրան քնած ժամանակ գազանաբար կացնահարել է ադրբեջանցի սպա, ավագ լեյտենանտ Ռամիլ Սաֆարովը: Երկուսն էլ Բուդապեշտում մասնակցում էին ՆԱՏՕ-ի «Գործընկերություն հանուն խաղաղության» ծրագրի շրջանակներում կազմակերպված անգլերեն լեզվի դասընթացներին:

2006-ի ապրիլի 13-ին մարդասպանը Բուդապեշտում դատապարտվել է ցմահ բանտարկության՝ 30 տարվա ընթացքում առանց ներման իրավունքի: 2012-ի օգոստոսի 31-ին Սաֆարովը Հունգարիայի կողմից արտահանձնվեց Ադրբեջանին, որտեղ անհապաղ ներում ստացավ՝ նրան շնորհվել է մայորի կոչում, նոր բնակարան, վճարվել 8 տարվա աշխատավարձը, որին ի պաստասխան Հայաստանը կասեցրել է դիվանագիտական հարաբերությունները Հունգարիայի հետ: Հայաստանում Գուրգեն Մարգարյանի անունով դպրոց է անվանակոչվել, որը hayeli.am-ի տեղեկություններով, ցանկանում են դարձնել քույր դպրոց Հունգարիայի դպրոցներից մեկի հետ՝ ձգտելով «սվաղել» Հունգարիայի հետ լարված հարաբերությունները: Մեր տեղեկություններով՝ ՀՀ իշխանությունն ամեն կերպ փորձում է այս արարքը գաղտնի պահել:

Հիշեցնենք, որ Գուրգեն Մարգարյանը 2005-ի փետրվարի 19-ին հետմահու պարգևատրվել է «Արիության համար» մեդալով՝ ծառայության ընթացքում դրսևորած արիության ու ինքնազոհողության համար: