Դավիթ Տոնոյանի գործի վերաբերյալ Ալեն Սիմոնյանը խուսափեց մեկնաբանություններից

Կաշխատեմ զերծ մնալ Դավիթ Տոնոյանի հետ կապված մեկնաբանություններից երկու պատճառով՝ մենք իրար հետ աշխատել ենք, երկրորդ՝ իմ կարգավիճակն ինձ թույլ չի տալիս հավելյալ մեկնաբանություն անել քրեական գործի մասով:Այս մասին ԱԺ-ում լրագրողների հետ զրույցում ասաց ԱԺ նախագահ Ալեն Սիմոնյանը՝ մեկնաբանելով ՊՆ նախկին նախարար Դավիթ Տոնոյանի փաստաբանական խմբի հայտարարությունը:

Անդրադառնալով նաև 44-օրյա պատերազմի հանգամանքները քննող հանձնաժողովի ձևավորման գործընթացին՝ԱԺ նախագահը պարզաբանեց, որ խորհրդարանը դեռևս ձևավորման փուլում է, անավարտ գործընթացներ կան սրա հետ կապված, նաև իշխանական և ընդդիմադիր մի շարք պատգամավորներ մինչ օրս գաղտնիության հետ կապված իրենց փաստաթղթերը չեն ներկայացրել, ինչի հետևանքով էլ քննիչ հանձնաժողովի ձևավորման աշխատանքները հետաձգվում են:
Դիտարկմանը, որ իշխանությունը փորձում է 44-օրյա պատերազմի մեղքը բարդել ԶՈՒ բարձրաստիճան զինվորականների, ինչով էլ պայմանավորված են նրանց կալանավորումները կամ մեղադրանքներ առաջադրելը, Ալեն Սիմոնյանն արձագանքեց.

«Պատերազմի ավարտի հաջորդ օրվանից սկսած՝ քաղաքական իշխանությունը բոլոր հարվածները վերցրել է իր վրա և հաճախ նույնիսկ ակնհայտ հարցերում իր պատասխանատվության աստիճանն ավելի բարձր է դրել, քան մնացածի աստիճանը: Որոշ ժամանակ առաջ անգամ բանակը ներգրավվեց քաղաքական գործընթացներում, բայց նույնիսկ այդ ժամանակ չեղավ մի դեպք, երբ բարձրաստիճան որևէ պաշտոնյա փորձի ինչ-որ բան բարդել նրանց վրա », - ասաց Ալեն Սիմոնյանը։