Ես պատրաստ եմ ձեզ հետ անցնել այն ճանապարհը, որով մենք տեր կկանգնենք մեր երկրին. Վազգեն Մանուկյանի ուղերձը

«Հայրենիքի փրկության շարժման» վարչախպետի թեկնածու Վազգեն Մանուկյանը հանդես է եկել տարեվերջյան ուղերձով, որտեղ ասվում է.

«Սիրելի հայրենակիցներ, քույրեր եւ եղբայրներ,

Մենք միշտ Նոր տարին դիմավորել ենք տոնական սեղանով, հարազատների ժպիտով մաղթանքներով, լավատեսությամբ: Սա այդ Նոր տարին չէ:

Դժվար, դաժան էր 2020 թվականը, հազարավոր զոհեր, տասնյակ հազարավոր վիրավորներ, գերիներ, անհետ կորածներ, փախստականներ, տարածքային ահռելի կորուստներ: Մեր ազգային արժանապատվությունը ոտնահարված է, մեր բազմաթիվ հայրենակիցներ մխիթարություն, վաղվա հանդեպ հույս են փնտրում ու դեռ չեն գտնում:

Մենք կորցրել ենք անկախ պետականության մեր ամենամեծ նվաճումը, մեր հավաքական երազանքը՝ արցախյան հաղթանակը: Այսօր ապահովված չեն անգամ Հայաստանի անվտանգությունն ու ինքնիշխանությունը: Պատերազմը հնարավոր էր կանխել, պատերազմական գործողությունների ավարտն էլ այս տեսքը չէի ունենա, եթե սխալ ու կասկածելի որոշումներ չընդունվեին: Տեղի ունեցածը դավաճանության, անգրագիտության, ստի ու կեղծիքի հետեւանքներ են: Դա փոքր մարդու մեծ վրեժն էր հայ ժողովրդից, Արցախից, Հայաստանից:

Մեր երկրում այսօր անիշխանություն է եւ պետական կառավարման ճգնաժամ: Իսկ հասարակության տրամադրությունները կառավարվում եւ ուղղորդվում են սոցիալական ցանցերից, դիտավորյալ կազմակերպված արհեստական օրակարգերով:

Հայրենակիցներ,

2020 թվականը ողբերգության, բայց նաեւ հերոսության տարի էր, ես խոնարհվում եմ Արցախի ու Հայաստանի համար մղված մարտերում զոհված մեր քաջերի հիշատակի առջեւ, ցավակցում նրանց հարազատներին, համբերություն, տոկունություն մաղթում բոլորիս:

Ցավակցում եմ նաեւ կորոնավիրուսից մահացած մոտ 3 հազար մեր քաղաքացիների ընտանիքներին:

2021 թվականին մենք հսկայական անելիքներ ունենք, պետք է ապահովենք արժանապատիվ խաղաղություն, արդիականացնենք հայկական բանակը, ձեռք մեկնենք արցախահայությանը, տեր կանգնենք Հայաստանի սահմաններին, թույլ չտանք սոցիալ-տնտեսական կոլապս, ներդրումներ բերենք, նոր բովանդակությամբ լցնենք ռազմավարական դաշնակից Ռուսաստանի հետ հարաբերությունները, արժանավայել շփվենք աշխարհի հետ, վերացնենք թույնի եւ ատելության մթնոլորտը: Ամենակարեւորը, ՀՀ քաղաքցիների, հայության մոտ մենք վերականգնելու ենք հավատը ապագայի հանդեպ: Այդ հավատով միայն կարող ենք հաղթահարել ներկայիս դժվարությունները: Ես տեսնում եմ, ես պատրաստ եմ ձեզ հետ անցնել այն ճանապարհը, որով մենք տեր կկանգնենք մեր երկրին, մեր արժեքներին, մեր արժանապատվությանը:

Ես հվատում են Հայաստանի եւ Արցախի վերականգնմանը, վերածննդին:

Սիրելի ժողովուրդ, մենք հազարամյակներից եկող ժողովուրդ ենք, մենք ականատես ենք եղել եգիպտական բուրգերի կառուցմանը, հին Հռոմի վերացմանը, խաչակիրների արշավանքներին, հմաշխարհային պատերազմներին: Մենք մասնակից ենք եղել այդ բոլոր իրադարձություններին՝ մեծ ներդրում կատարելով այժմյան համաշխարհային քաղաքակևրթության մեջ: Մեզ վայել չէ այդ բարձունքից իջնել, թուլանալ, սահմանափակել մեր երազանքները: Մենք նորից ոտքի պետք է կանգնենք եւ շարունակենք առաջ գնալ:

Թող նոր՝ 2021 թվականը առողջություն, համերաշխություն եւ խաղաղություն բերի, թող լինի նոր հաղթանակների սկզբնավորման տարի:

Շնորհավոր Ամանոր եւ Սուրբ ծնունդ: