Լեռնային Ղարաբաղը դառնում է Թուրքիայի և Արևմուտքի միջև բախման թատերաբեմ. Greek City Times

Հունական Greek City Times պարբերականը հրապարակել է վերլուծական հոդված, որում հեղինակ Քերման Մամեդովն անդրադառնում է արցախյան հակամարտությանը և դրա հետևանքով տարածաշրջանում ձևավորված քաղաքական իրավիճակին:

Հեղինակը հիշեցնում է, որ անցյալ շաբաթ տեղի ունեցած ԵԱՀԿ Մինսկի խմբի համանախագահների այցը Բաքու նպատակ ուներ քննարկելու Լեռնային Ղարաբաղի հակամարտության կարգավորման հարցը: Միևնույն ժամանակ նա ընդգծում է, որ ԱՄՆ պետքարտուղարի Եվրոպայի և Եվրասիայի հարցերով օգնականի պաշտոնակատար Ֆիլիպ Ռիկերն անդրադարձել է հարցի՝ բանակցային տարբերակով կարգավորմանն ու նշել, որ այլընտրանք քան բանակցությունները չի տեսնում: Ըստ Մամեդովի՝ ամերիկացի դիվանագետի ելույթը հստակ ցույց է տալիս՝ Լեռնային Ղարաբաղի հակամարտության կարգավորման հարցում Թուրքիայի ծայրահեղ ակտիվության նկատմամբ դժգոհությունը:

Եռակողմ համաձայնագրի ընդունումից հետո Թուրքիայի նախագահ Ռեջեփ Թայիփ Էրդողանն ու Ադրբեջանի նախագահ Իլհամ Ալիևն աշխատում են պաշտոնական Անկարայի՝ հակամարտության կարգավորման լիիրավ մասնակցի կարգավիճակի օրինականացման ուղությամբ, նշում է հեղինակը:

Թուրքիայի դերը Հարավային Կովկասում ամրապնդելու նպատակով՝ Ռուսաստանի Դաշնության նախագահ Վլադիմիր Պուտինի հետ անհաջող բանակցություններց հետո, հակամարտության կարգավորման լիիրավ անդամ լինելուն պես, Անկարան հավանաբար խաղաղապահ առաքելություն կտեղակայի Լեռնային Ղարաբաղի տարածքում:

Մինչ այդ Թուրքիան հայտարարել է ինժեներական ստորաբաժանումների՝ տարածքը մաքրելու նպատակով Լեռնային Ղարաբաղ արագ տեղափոխման մասին, ինչը ռուս և հայ ռազմական փորձագետների շրջանում առաջացրել է մտավախություն առ այն, որ Թուրքիան սակրավորների անվան տակ կարող է հատուկջոկատայիններ ուղարկել՝ դիվերսիոն գործողություններ կատարելու նպատակով, նշում է հեղինակը:

Անդրադառնալով Ալիևին, Մամեդովը նշում է, որ Բաքուն փորձում է փոփոխություններ մտցնել նոյեմբերի 9-ին ստորագրված համաձայնագրում՝ ռուս խաղաղապահ առաքելությանը «ադրբեջանական հողում» ընդգրկելով:

Հակամարտության կարգավորմանն ուղղված գործընթացների հետևանքով սրվում են Մոսկվայի և Անկարայի դիվանագիտական հարաբերությունները, ինչն արդեն ակնհայտ է դառնում:

Այս համատեքստում Արևմուտքը կարող է օգտվել հակամարտության կարգավորման նախաձեռնությունից, որը, սակայն, դժվար թե կարողանա միայնակ անել՝ հաշվի առնելով կորոնավիրուսային հիվանդության արդյունքում պատճառված տնտեսական ահռելի վնասը: Այնուամենայնիվ, Ռուսաստանի հետ միավորվելու արդյունքում, դա կարող է մեղմացնել Էրդողանի ախորժակը տարածաշրջանում, նշում է հեղինակը:

Մոսկվայի և Արևմուտքի հակաթուրքական նախաձեռնության առաջին քայլը, ամենայն հավանականությամբ, կլինի Լեռնային Ղարաբաղում տեղակայված ռուս խաղաղապահ առաքելությանը ԵԱՀԿ մանդատի տրամադրումը:

Ամերիկացի փորձագետ Բրեդլի Ռեյնոլդսը մատնանշում է Փարիզի և Վաշինգտոնի հետ «ժամանակավոր» կոալիցիա ստեղծելու հարցում Մոսկվայի շահագրգռվածությունը, մեջբերում է հեղինակը: Որին ի պատասխան Սպիտակ տունը չի հերքում Ռուսաստանի Դաշնության հետ համագործակցության պատրաստակամությունը:

«Մենք մտահոգված ենք Թուրքիայի դերի, օտարերկրյա զինյալների մասնակցության, Անկարայի կողմից Ադրբեջանին զենք մատակարարելու կապակցությամբ: Այս հարցերը՝ Ռուսաստանի հետ մեր երկխոսության օրակարգում են» – ընդգծել է Եվրոպայի և Եվրասիայի հարցերով ԱՄՆ Պետքարտուղարի օգնականի պաշտոնակատար Ֆիլիպ Ռիկերը:

«Ներկա պայմաններում Լեռնային Ղարաբաղը, որը վերջերս Հայաստանի և Ադրբեջանի միջև ռազմի դաշտ էր, դառնում է Արևմուտքի և Թուրքիայի միջև բախման թատերաբեմ» - գրում է հեղինակը:

Հոդվածի ավարտին հեղինակ Մամեդովը նշում է, որ այս համատեքստում Թուրքիան կարող է միայնակ մնալ արևմտա-ռուսական դաշինքի առջև: