«ՌԴ-ն խաղաղապահների միջոցով ամեն կերպ նպաստելու է ռազմագերիների փոխանակման կարևորագույն խնդրի՝ հնարավորինս արագ լուծմանը». Լավրով
ՌԴ ԱԳ նախարար Սերգեյ Լավրովն իր հայ գործընկեր Արա Այվազյանի հետ մոսկովյան բանակցությունների ընթացքում հայտարարել է, որ Լեռնային Ղարաբաղում կրակի դադարեցման շուրջ ստորագրված եռակողմ հայտարարությունը ու դրա շրջանակում ձեռք բերված պայմանավորվածությունները հնարավորություն են տալիս փախստականներին, ներքին տեղահանվածներին վերադառնալ իրենց տներ, պայմանավորվածություններ են ապահովում տնտեսության վերականգնման, մարդասիրական խնդիրների լուծման և հեռահաղորդակցության միջոցների ապաարգելափակման վերաբերյալ:
«Այսպիսով, մենք կարող ենք պայմաններ ստեղծել Հարավային Կովկասը հակասությունների տարածաշրջանից կայունության և բարգավաճման տարածաշրջանի վերածվելու համար, ինչն այնտեղ ապրող բոլոր ազգերի շահերից է բխում: Մենք ամեն կերպ կաջակցենք այս ուղղությանը»,-ասել է Լավրովը:
Նա ընդգծել է, որ ռուս խաղաղպահները ԼՂ-ում իրենց պատասխանատվության տարածքում ակտիվ աշխատանք են տանում խաղաղ կյանքի վերականգնման համար:
Անդրադառնալով ռազմագերիների փոխանակման խնդրին՝ ՌԴ ԱԳ նախարարն ասել է, որ այս կարևորագույն հարցով ՌԴ-ն խաղաղապահների միջոցով ամեն կերպ նպաստելու է դրա՝ հնարավորինս արագ լուծմանը:
«Գիտենք, թե դա որքան սուր թեմա է գերության մեջ գտնվողների հարազատների, բարեկամների, ընկերների համար»,-ասել է Լավրովը՝ ընդգծելով, որ դիերի փոխանակման հարցը ևս շատ կարևոր է: