Nissan-ը որոշել է արձակուրդի ուղարկել մոտ 15 000 աշխատակցի

Ճապոնական Nissan ընկերության ղեկավարությունը որոշել է վճարովի արձակուրդի ուղարկել մոտ 15 հազար աշխատակցի` նոր կորոնավիրուսի տարածման ֆոնին, հայտնում է ՏԱՍՍ-ը:

Nissan-ի այս աշխատակիցներն ապրիլի 27-ից մայիսի 1-ը չեն հաճախի աշխատանքի: Kyodo գործակալության փոխանցմամբ` արձակուրդի կգնան մենեջմենթի եւ տեխնիկական մշակման բաժնի մասնագետները, ովքեր աշխատում են ընկերության` Ճապոնիայում տեղակայված մի շարք գործարաններում:

Ապրիլի 7-ին Kyodo-ն հայտնել էր, որ Nissan-ը կարող է մոտ 10 000 աշխատատեղ կրճատել իր արտասահմանյան ձեռնարկություններում` կորոնավիրուսի տարածման պատճառով արտադրությունը դադարեցնելու հետեւանքով:

Ապրիլի 17-ից մայիսի 6-ը Ճապոնիայի ամբողջ տարածքում արտակարգ ռեժիմ է գործում: Նման միջոցառումների հիմնական նպատակն է նվազագույնի հասցնել շփումները մարդկանց միջեւ, ինչպես նաեւ արձակուրդների ընթացքում կանխարգելել ակտիվ ուղեւորությունները երկրի տարածքով ապրիլի վերջին-մայիսի սկզբին:

Ճապոնիայում նոր կորոնավիրուսով վարակվածության հաստատված դեպքերի ընդհանուր թիվը մոտ 12 հազար է, 235 վարակված գտնվում էին ծանր վիճակում, արձանագրվել է 276 մահվան դեպք: