Ժնևի միջազգային ավտոսրահը չի կայանա կորոնավիրուսի պատճառով

Միլիոնավոր ավտոսիրողների ամենասպասված միջոցառումներից մեկը՝ Ժնևի միջազգային ավտոսրահը, չեղարկվել է նոր տեսակի կորոնավիրուսի պատճառով, հայտնում է «ՌԻԱ Նովոստի» գործակալությունը` հղում տալով միջոցառման կազմակերպիչների տարածած մամուլի հաղորդագրությանը:

«90-րդ միջազգային ավտոսրահը, որը պետք է լրատվամիջոցների համար հաջորդ երկուշաբթի, իսկ այցելուների համար մարտի 5-15-ն ընկած ժամանակահատվածում բացվեր, տեղի չի ունենա»,- ասվում է հայտարարության մեջ:

Կազմակերպիչներն ընդգծել են, որ նման որոշումը կապված է Շվեյցարիայի կառավարության պահանջի հետ, ըստ որի նոր տեսակի կորոնավիրուսի պատճառով մինչև մարտի 15-ը պետք է չեղարկվեն բոլոր այն միջոցառումները, որոնց հնարավոր է, որ 1000 հոգուց ավելի մարդ մասնակցի:

Անցած տարի Ժնևի միջազգային ավտոսրահ ավելի քան 600 000 մարդ է այցելել: