Nissan-ի նախկին ղեկավարը Տոկիոյում տնային կալանքից փախչելուց հետո Լիբանանում հանդիպել է երկրի նախագահի հետ

Թուրքիայի ոստիկանությունը 7 մարդու է ձերբակալել, այդ թվում և 4 օդաչուի՝ կապված Nissan-ի նախկին ղեկավար Կառլոս Գոնի տարանցիկ թռիչքի հետ, որը Ճապոնիայից Լիբանան փախչելիս Ստամբուլի տարածքով է անցել: Այս մասին տեղեկացնում է Reuters գործակալությունը՝ հղում անելով թուրքական հեռուստաալիքին:

Հաղորդվում է, որ Renault-Nissan-Mitsubishi միության նախկին ղեկավարը Տոկիոյից Բեյրութ փախչելուց հետո հանդիպում է ունեցել Լիբանանի նախագահ Միշել Աունի հետ:

Աղբյուրի տեղեկություններով` հանդիպման ժամանակ Գոնը շնորհակալություն է հայտնել լիբանանցի առաջնորդին աջակցության համար, որը նա տրամադրել է իրեն և իր կնոջը, երբ Գոնը կալանքի տակ է եղել:

Հիշեցնենք, որ Կառլոս Գոնի նկատմամբ տնային կալանք էին սահմանել Տոկիոյում, սակայն վերջինիս հաջողվել է փախուստի դիմել և մեկնել Լիբանան, որի քաղաքացի է հանդիսանում գործարարը: