Ստուգայցերը, մեքենաները երթուղուց դուրս բերելը ավելի աղետալի կդարձնեն տրանսպորտի վիճակը
Այս իրավիճակում քաղաքապետարանի կողմից Երևանի հասարակական տրանսպորտում ստուգայցերը քաղաքային իշխանությունների ոչ պրոֆեսիոնալիզմի վկայությունն է: 100 դրամով մարդիկ չեն կարողանում եղածը պահել, մի հատ էլ ստուգայցեր են անում: Այս մասին Tert.am-ի հետ զրույցում ասաց Փոխադրողների միության նախագահ Հրանտ Եղիազարյանը:
Ըստ նրա՝ ստուգայցերը և որոշ մեքենաներ երթուղուց դուրս բերելը ավելի աղետալի կդարձնեն հասարակական տրանսպորտի վիճակը:
«Մի երթուղի եթե սպասարկվում է 10 մեքենայով, 3-ը հանում եք, մնում են 7-ը, իսկ այդ 3 մեքենայի ուղևորները ստիպված պետք է օգտվեն մնացած 7-ից: Այդ 7-ի վրա ծանրաբեռնվածությունն ավելի է մեծանում, և խնդիրները մեծանում են՝ ավելի հաճախ է փչանալու»,- նշեց Հրանտ Եղիազարյանը:
Հիշեցնենք, որ Երևանի քաղաքապետարանի «Երևանտրանս» ՓԲԸ աշխատակիցները հոկտեմբերի 1-ին ստուգայցեր էին իրականացրել մայրաքաղաքի հասարակական տրանսպորտը սպասարկող թիվ 13, 57 և 99 երթուղիներում: Միկրոավտոբուսային թիվ 99 երթուղում ուսումնասիրության ընթացքում հայտնաբերվել են արտաքին և ներքին տեսքի մի շարք թերություններ: Մասնավորապես, որոշ մեքենաների ուղևորասրահներ գտնվել են հակասանիտարական և անբարեկարգ վիճակում: Այդ մեքենաները դուրս են բերվել երթուղուց: Քաղաքապետարանի հաղորդագրությունում նաև նշվում է, որ ստուգայցերը կրելու են շարունակական բնույթ. ուսումնասիրվելու են բոլոր երթուղիները:
Հրանտ Եղիազարյան նշում է, որ նոր տրանսպորտային ցանցի ներդրման ժամանակ անխուսափելի է ուղեվարձի թանկացումը, բայց մինչ այդ էլ, նրա կարծիքով՝ պետք է բարձրացում լինի, որպեսզի հնարավոր լինի ներկայիս շարժակազմի շահագործումը:
«Պարզապես պետք է տղամարդկություն ունենան, կանգնեն, ժողովրդին ասեն, որ 100 դրամով այլևս հնարավոր չէ աշխատել: Ասեն՝ խնդրում ենք, մեր արածների համար մեզ կներեք: 2013 թ.-ին փոխադրողները, որ ասում էին՝ եկեք անցնենք ուրիշ ուղեվարձի, իրենք ասում էին՝ ոչ, 100 դրամն էլ է շատ, և այդ ոչ ասողները հիմա նստած են քաղաքապետարանի ղեկավար կազմում:
Հիմա պետք է ասեն՝ ժողովո՛ւրդ, մենք սխալվել ենք, թվերից տեղյակ չէինք, հավատացեք մեզ մի անգամ էլ, ուղեվարձը բարձրացնենք, որը հնարավորություն կտա եղած փոխադրողներին այս մեքենաները նորմալ վիճակում պահել, հնարավոր լինի դրանց շահագործումը, մինչև տեսնենք՝ նոր երթուղային ցանցը ինչպես ենք կյանքի կոչում»,- ասաց նա:
Փոխադրողների միության նախագահի խոսքով՝ 2013 թ.-ից ի վեր՝ տրանսպորտի ուղեվարձի թանկացման որոշման կասեցումից հետո, փակվել է 27 ավտոբուսային և 12 միկրոավտոբուսային երթուղի: Նա համոզված է, որ 2013 թ.-ին ուղեվարձի բարձրացման դեպքում 6 տարի անց լիովին այլ շարժակազմ կլիներ:
«Այսօրվա քաղաքապետը փոխադրողներին առաջարկել մեքենաներ ներկրել, ասել է՝ եթե ավտոբուսներ ներկրեք, ուրեմն կաշխատեք նաև նոր երթուղային ցանցի դեպքում: Բայց այդ, մարդիկ արդեն խրված են, այդպիսի մարդ կա՞, որ կուզանա ավելի շատ խրվել: Նոր ցանցի մասին էլ մեր քաղաքապետը երբ ելույթ է ունենում, ասում է՝ 2 տարի հետո կլինի, բայց թե դրա մեկնարկը երբ է տրվելու, չգիտենք: Այդ երկու տարին երբ է լրանալու, ոչ ոք չգիտի: Ի տարբերություն ներկայիս իշխանությունների՝ նախորդ քաղաքային իշխանություններն ասում էին 2018 դեկտեմբերի, 2019 թ.-ի հունվար նոր երթուղային ցանցը կլինի»,- նկատեց Հրանտ Եղիազարյանը:
Իրանի դեմ հարվածների ֆոնին ՀԱԵ Ատրպատականի թեմը դադարեցրել է եկեղեցական արարողությունները
Հայաստանն ու Իրանն աշխատում են սահմանին երկրորդ կամրջի նախագծի վրա
Եվրախորհրդարանի պատգամավորները չեն կարողացել աշխարհի քարտեզի վրա գտնել Իրանը
Լարիջանիի սպանությունից հետո Իրանը կասետային ռումբերով հարվածել է Թել Ավիվին
Իրանի հարստացված ուրանի պաշարները միջուկային օբյեկտների փլատակներում են
Եվրամիությունը չի հասկանում Իրանում պատերազմի նպատակները. Կալաս
Անկանխիկ ստացման եղանակի անցնելու դիմում չներկայացրած կենսաթոշակառուի համար բանկը ընտրել է ՄՍԾ-ն՝ ին...
Երևանում և մարզերում կլինեն էլեկտրաէներգիայի ընդհատումներ
ԱԹՍ-ի հարվածի հետևանքով Դուբայի միջազգային օդանավակայանի մոտ հրդեհ է բռնկել
ԱՄԷ նախագահն ու Սաուդյան Արաբիայի թագաժառանգը քննարկել են տարածաշրջանային զարգացումները