Այսպիսի ցանցառ ընտրություններ դեռ չէին եղել

Կոլեկտիվ անլրջության ժամանակներ են: Լրջության պակաս է զգացվում: Նույնիսկ երկրի համար ամենակարեւոր միջոցառումը՝ ընտրությունը վերածել են ցանցառության:

Երբ հրապարակվեց ընտրողների թիվը՝ մոտ 2.5 մլն, արդեն իսկ պարզ դարձավ, որ բախվելու ենք հերթական ցանցառությանը: 2.5 մլն մարդ Հայաստանում չկա, ուր մնաց, թե ընտրող: Այսուհանդերձ, մեզ համոզում էին, թե դա կապ չունի, եւ որ կարեւորը ընտրության օրն է, եւ որ հետո ցուցակները հրապարակվելու են:

Համոզեցին, գնացինք ընտրության եւ արդեն ժամը 14-ին, երբ հրապարակվեց մասնակիցների թիվը, պարզ դարձավ, որ կրկին խայտառակ ընտրություններ են լինելու: Իհարկե,մինչ այդ էլ, երբ առավոտյան ութից ճորտերին վերակացուները բերեցին կամ քշեցին քվեարկության, արդեն իսկ պարզ էր, թե ինչ է լինելու: Պարզ էր, բայց մարդն ունի ինքն իրեն խաբելու, համոզելու տարօրինակ հատկություն: Մեզ հույս էինք տալիս, թե դեռ ամեն ինչ կորած չէ: Եւ ինչու էինք հույս տալիս, երբ արդեն անգամ քաղաքը խոսում էր, որ զինվորներին հանձնարարել են քվեարկել ոչ միայն ՀՀԿ-ի, այլ նաեւ այլ ուժերի, այն էլ այնպիսի, որոնք իրենք իրենց արմատական ընդդիմություն էին ներկայացնում:

Ցանցառությունը հասավ այնտեղ, որ պարզվեց 1.6 մլն մարդ մասնակցել է ընտրություններին: Խեղճ երկիր, ինչպես է դուրս գալու այս ստի տակից:

Համատարած փողաբաժանություն, համատարած հրահանգավորում, համատարած թվանկարչություն, համատարած սուտ: Եւ ի՞նչ է լինելու այս ցանցառության արդյունքում: Լինելու է արտագաղթ, սով, գործազրկություն, անկայուն ռազմաճակատի գիծ, ավելի զրոյացած միջազգային կշիռ եւ սարսափելի թվերի հասնող արտագաղթ:

Այլ կերպ չէր կարող լինել: Տեսեք, թե ովքեր են լինելու խորհրդարանում: Նայեք նրանց դեմքերին, ուշադիր նայեք, հետո փորձեք պատկերացնել, թե նրանք ինչ են մտածում այս կամ այն հարցի մասին:

Ցանցառությունը, կոլեկտից ցանցառությունն անհետեւանք չի մնում:

Վարդան Մխիթարյան

Այս թեմայով ՏԻՄ ընտրություններ Հայաստանում. 4 խոշոր համայնքներում քաղաքապետ են ընտրում Գտնվեց ապրիլյան խայտառակ ընտրությունների միակ մեղավորը Տնօրենները հայցից հրաժարվում են Հայաստանցի ընտրողի երգը «ՀՀ ընտրությունները չեն համապատասխանում ժողովրդավարական սկզբունքներին»