Տեսախցիկների թիվը խաչմերուկներում կավելանա եւս հինգով

Ճանապարհային ոստիկանությունը տեղեկացնում է, որ մարտի 19-ից գործարկվելու են Երևան քաղաքի հետևյալ խաչմերուկներում տեղադրված տեսախցիկները՝ Հովսեփ Էմինի փողոց-Փափազյան փողոց, Իսահակյան փողոց-Տերյան փողոց, Պարույր Սևակի փողոց-Ուլնեցու փողոց, Խանջյան փողոց -Վարդանանց փողոց, Տիգրան Մեծի փողոց-Գլինկայի փողոց:

Հաղորդագրության համաձայն՝ նույն օրվանից գործարկվելու է նաև Շիրակի մարզի Հոռոմ գյուղում՝ գյուղապետարանի հարակից ճանապարհահատվածում տեղադրված արագաչափ սարքը, մեկ արագաչափ՝ երկու ուղղություններով, որտեղ երթևեկության թույլատրելի արագությունը 60 կմ/ժ է:

Ճանապարհային ոստիկանությունը մեկ այլ հաղորդագրությամբ տեղեկացնում է, որ վաղը Երևանի Իսահակյան և Թամանյան փողոցների խաչմերուկում կկատարվի երթևեկության կազմակերպման փոփոխություն․ նշված խաչմերուկում տեղադրված «Մուտքն արգելվում է», «Աջ շրջադարձն արգելվում է», «Ձախ շրջադարձն արգելվում է», «Կանգառն արգելվում է» ճանապարհային նշանները և «Գործողության ժամանակ (11.00−24.00)» ցուցանակները, որոնք ձմռան ամիսներին ժամանակավորապես փակված էին ծածկոցներով, կվերաբացվեն և կսկսեն գործել նախկինի պես: