Էրդողանը սպառնացել է ԱՄՆ-ին

Թուրքիայի նախագահ Ռեջեփ Թայիփ Էրդողանը հայտարարել է, որ ԱՄՆ-ի՝ «Իսլամական պետություն» ահաբեկչական խմբավորման դեմ պայքարը Սիրիայում իրականում թատերական բեմականացում է և այժմ «վերածվել» է Թուրքիայի դեմ պայքարի:

Ինչպես հայտնում է թուրքական «Անադոլու» գործակալությունը, նման հայտարարություն Էրդողանն արել է՝ խոսելով ԱՄՆ-ի կողմից Սիրիայի քուրդ զինյալներին ԻՊ-ի դեմ պայքարի շրջանակում ցուցաբերված աջակցության մասին:

«Ասում եք, թե ԻՊ-ի դեմ եք պայքարում, արդեն կես միլիարդ եք ծախսել և այժմ ցանկանում եք այդ թիվը հասցնել երեք միլիարդի: Իսկ քանի՞ ԻՊ-ական եք սպանել այս ընթացքում: Եկել է ժամանակը վերջ տալու այդ թատրոնին»,- ասել է Էրդողանն ու կոչ արել ԱՄՆ-ին «հանել դիմակները»:

Թուրքիայի նախագահը նաև պատասխանել է ամերիկացի գեներալներից մեկի այն հայտարարությանը, որը հայտարարել էր, որ թուրքական ԶՈւ-ի՝ Մանբիջին հարվածելու դեպքում իրենք կոշտ պատասխան կտան:

«Այդպես խոսում են նրանք, ովքեր դեռ չեն տեսել օսմանյան բռունցքը», - ասել է Էրդողանը:

Հիշեցնենք, որ հունվարի 20-ին թուրքական ԶՈւ-ն սկսել է Սիրիայի հյուսիսում գտնվող քրդական ազգային զինված ջոկատների (PYD/YPG) դեմ ռազմական գործողությունը, որը ստացել է «Ձիթենու ճյուղ» անվանումը: Օդային առաջին հարձակումներից հետո, հունվարի 21-ին թուրքական ԶՈւ-ի զինվորականներն անցել են լայնամասշտաբ հարձակման նաև ցամաքում: Հայտնի է, որ թուրքական ԶՈւ-ին աջակցում է «Սիրիական ազատ բանակ» ընդդիմադիր խմբավորումը՝ ինչպես 2016թ.-ին ձեռնարկված «Եփրատի վահան» գործողության ժամանակ: