Հայաստանի փողոցներում պետք է արտակարգ դրություն եւ պարետային ժամ մտցնել

Ամեն օր կամ գրեթե ամեն օր Հայաստանի ճանապարհներին ավտովթարների հետեւանքով մարդիկ են զոհվում եւ վիրավորվում: Այսքան քիչ բնակչություն ունեցող երկրում այսքան մեծ թվով վթարներն ու զոհերը բանականության սահմաններում չեն տեղավորվում:

Այսօր էլ օրը սկսեցինք ողբերգական լուրով: Երեւանում մայրը տասնամյա աղջկան դպրոց է տանում, եւ հենց դպրոցի դիմաց ավտոմեքենան հարվածում է նրանց: Մայրը զոհվում է, աղջիկը վիրավորվում: Մեկ ընտանիքում, առնվազն մեկ ընտանիքում, ողբերգություն է, երբ այն կարող էր չլինել:

Եթե երեխաներին հարվածում են դպրոցի դիմաց, ապա պատկերացրեք ինչպես են վարում ավտոմեքենաները մյուս վայրերում: Նախօրեին կրկին ողբերգական վթարներ տեղի ունեցան Երեւանում, Սիսիանում:

Մի քանի օր առաջ հասարակությունը ցնցվել էր ավտովթարի հետեւանքով երկու երիտասարդ ոստիկանների մահվամբ: Մենք պետք է հասկանանք, որ իրավիճակը կտրուկ միջամտության կարիք է զգում: Առանց չափազանցության, Հայաստանի բոլոր ճանապարհներին պետք է արտակարգ դրություն մտցնել՝ պարետային ժամով:

Այն պետք է շարունակվի այնքան ժամանակ, քանի դեռ վթարները չեն հասցվել զրոյական մակարդակի: Պետք է իրականացվի ուժեղացված պարեկային աշխատանք, պետք է հաճախ կանգնեցվեն եւ ստուգվեն կասկածելի ընթացք ունեցող ավտոմեքենաները: Վերջին հաշվով, մենք մի օր պետք է հասկանանք, որ այս երկրում թիվ մեկ արժեքը մարդն է:

Հիմա ով է պատասխան տալու այն ընտանիքի առաջ, ով առավոտ շուտ՝ երեխային դպրոց տանելիս կորցրել է աղջկան, կնոջը, մորը: Ով պետք է պատասխան տա մյուս զոհերի հարազատների առաջ: Այսպես շարունակել չի կարելի: Մեզնից յուրաքանչյուրն ամեն օր ականատես է լինում մի խելահեղ վարորդի հիմարություններին, որոնց գործողության արդյունքում հրաշքով մարդիկ չեն տուժում: Այս ամենին պետք է վերջ տրվի:

Կարող է պրիմիտիվ հնչել, բայց դպրոցներում երեխաներին պետք է երթեւեկության կանոններն ուսուցանվեն, մյուսներին համացանցով եւ հեռեւստատեսությամբ օգնել հասկանալ, թե ինչպես պետք է վարեն ավտոմեքենաները եւ այլն, եւ այլն, բայց ակնհայտ է, որ պետք է սկսել ճանապաքրհներին արտակարգ դրություն եւ պարետային ժամ մտցնելով:

Top-News.am