Տաքսու վարորդների բարձրացված բոլոր խնդիրներին լուծումներ են տրվել․ ՄՍՇՊՀ

Մրցակցության և սպառողների շահերի պաշտպանության հանձնաժողովում հերթական հանդիպումն է տեղի ունեցել Yandex Armenia-ի տաքսու վարորդների հետ։ Հանձնաժողովի նախագահ Գեղամ Գևորգյանը ներկայացրել է նախորդ հանդիպման ընթացքում վարորդների կողմից բարձրացված խնդիրների ուղղությամբ իրականացված աշխատանքները։

Մասնավորապես արդեն իսկ փորձարկման փուլում է Yandex go հավելվածում ուղևորների կողմից պատվերի վայրի սահմանափակման գործառույթը։ Երևանի կենտրոն համայնքի մի շարք վայրերի համար առանձնացվել են պատվերների թույլատրելի գոտիներ՝ բացառելով ուղևորների կողմից կանգառի համար չթույլատրված վայրերից պատվերների կատարումը։

Վարորդներն իրենց եկամուտների մասին տեղեկատվությունը կարող են Պետական եկամուտների կոմիտեից ստանալ։ Քննարկվում է առանց միջնորդների ուղիղ Yandex Armenia-ի հետ աշխատելու հնարավորության հարցը։

Վարորդները հավաստեցին, որ նախորդ հանդիպման ընթացքում իրենց կողմից ներկայացված բոլոր հարցերին լուծումներ են տրվել, ներկայացրեցին լրացուցիչ դիտարկումներ և առաջարկներ առանձին դեպքերի առնչությամբ, այդ թվում՝ կապված հարկադիր կատարման ծառայության կողմից բռնագանձման ենթակա գումարները ժամանակացույցով վճարելու հնարավորության, հատուկ գոտիներում սպասելաժամանակի կրճատման, տաքսոպարկերի ընտրության, վարորդների վարկանիշների հաշվարկման և այլ խնդիրների հետ։