Վրիպումները չկրկնելու ժամանակը. Արարատ-Արմենիա – Ցելյե հանդիպմանն ընդառաջ
Եվրոպա լիգայի որակավորման 3-րդ փուլում Հայաստանի գործող չեմպիոն «Արարատ-Արմենիան» այսօր Երևանում կընդունի Սլովենիայի չեմպիոն «Ցելյեին»: Հայկական թիմը երկրորդ անգամ մոտ է պատմական նվաճմանը հասնելուն: Նախորդ տարի «Արարատ-Արմենիան» Վարդան Մինասյանի գլխավորությամբ հասավ մինչև ԵԼ փլեյ-օֆֆ, որտեղ միայն 11 մետրանոց հարվածաշարերով պարտվեց Լյուքսեմբուրգի չեմպիոն «Դյուդելանժին»:
Եվրագավաթներ 2020/21. «Արարատ-Արմենիայի» անցած ճանապարհը
«Արարատ-Արմենիան» եվրագավաթներում մեկնարկեց Չեմպիոնների լիգայի որակավորման առաջին փուլում, որտեղ զիջեց Կիպրոսի չեմպիոն «Օմոնիային»: Խաղի հիմնական ժամանակն ավարտվեց գոլազուրկ, իսկ լրացուցիչ ժամանակում Կիպրոսի թիմի խփած միակ գոլը Հայաստանի չեմպիոնին դուրս թողեց ՉԼ մրցաշարից: Եվրոպա լիգայի որակավորման 2-րդ փուլում Կամպանյայի թիմը հաղթահարեց Լյուքսեմբուրգի չեմպիոն «Ֆոլա-Էշի» արգելքը: Այս առումով կարելի է ասել, որ «Արարատ-Արմենիան» հայ-լյուքսեմբուրգական դիմակայությունում փոքրիկ ռեվանշի հասավ՝ նախորդ տարի «Դյուդելանժից» կրած պարտության դիմաց:
Հայաստանի չեմպիոնի մրցակիցը. «Ցելյե»՝ Սլովենիա:
«Ցելյեն» հիմնադրվել է 1919 թվականին: 1991 թվականից մեկնարկած Սլովենիայի առաջնությունում մասնակցել է Առաջին լիգայի (Բարձրագույն դիվիզիոն) բոլոր մրցաշրջաններին: Երկրի առաջնությունում այս տարի «Ցելյեն» ցույց է տվել լավագույն արդյունքը, պատմության մեջ առաջին անգամ նվաճելով չեմպիոնի կոչումը: Մինչև այս «Ցելյեի» լավագույն արդյունքը եղել է 2-րդ հորիզոնականը (2002/03 և 2014/15):
Սլովենիան ներկայացնող թիմի համար սա 10-րդ մասնակցությունն է եվրագավաթներին: Բալկանյան երկրի թիմի լավագույն արդյունքը եղել է ՈւԵՖԱ-ի գավաթի որակավորման մեկ փուլ հաղթահարելը, իսկ 2001 թվականին հաղթահարել է Ինտերտոտոյի գավաթի խաղարկության 2 փուլ: Ընդանուր առմամբ, «Ցելյեն» 3 անգամ խաղացել է Ինտերտոտոյի գավաթի խաղարկությունում, 5 անգամ ԵԼ-ում, իսկ այս տարի առաջին անգամ մասնակցում էր Չեմպիոնների լիգային, որտեղ որակավորման առաջին փուլում 3:0 հաշվով հաղթել է իռլանդական «Դունդալկին», իսկ 2-րդ փուլում 1:2 հաշվով պարտվել է Նորվեգիայի չեմպիոն «Մոլդեին» և հնարավորություն ստացել պայքարը շարունակել ԵԼ որակավորման 3-րդ փուլում:
Վրիպումները կարող են լինել ճակատագրական
«Արարատ-Արմենիայի» հաղթանակը որակավորման 2-րդ փուլում «Ֆոլա-Էշի» նկատմամբ, իհարկե, անակնկալ չէր: Լինելով դիմակայությունում ֆավորիտ՝ Հայաստանի չեմպիոնը քիչ էր մնում պարտվեր մրցակցին երկու գնդակի տարբերությամբ, սակայն 90-րդ րոպեին ամեն ինչ գլխիվայր շրջվեց և մրցակցի դարպասին նշանակված 2՝ 11 մետրանոցները դիպուկ իրացնելուց հետո լրացուցիչ ժամանակում «Արարատ-Արմենիան» կարողացավ հաղթել մրցակցին և դուրս գալ 3-րդ փուլ: Հանուն արդարության նշենք, որ Հայաստանի չեմպիոնն ուներ բացահայտ առավելություն, և եթե իրացվեր գոլային պահերի գոնե կեսը, ապա Լյուքսեմբուրգի չեմպիոնը խոշոր հաշվով պարտված կհեռանար Երևանից:
Կամպանյայի թիմը չիրացրեց բազմաթիվ գոլային պահեր, մի քանի դրվագում նպաստավոր դիրքից վրիպեց Օտուբանջոն: Իհարկե մրցակցի արգելքը չհաղթահարելու դեպքում հայկական թիմի պարտությունը կարելի էր որակել «ամոթալի», սակայն ֆուտբոլ խաղում են մինչև մրցավարի եզրափակիչ սուլիչը և Հայաստանի չեմպիոնը խաղավերջում կարողացավ բեկել ամբողջ դիմակության ելքը և հաղթել:
Ինչպես ընդունված է ասել, հաղթողներին չեն դատում, սակայն պետք է հետևություններ անել կատարած սխալներից ու բացթողումներից, քանի որ վաղը սպասվում է անհամեմատ ավելի հզոր, բայց ոչ անանցանելի մրցակից:
Եթե նախորդ խաղում «Արարատ-Արմենիային» հաջողվեց հետ բերել կորցրածը, ապա Սլովենիայի չեմպիոնի հետ դիմակայությունում չի կարելի թույլ տալ նախորդ խաղի սխալներն ու վրիպումները, հակառակ դեպքում՝ մրցակիցը կարող է մեզ չներել: Փաստ է, որ «Ցելյեն» կարգով բարձր է «Արարատ-Արմենիայի» նախորդ մրցակցից: Նշենք, որ Սլովենիայի չեմպիոնի ֆուբոլիստների ընդհանուր տրանսֆերային գումարը կազմում է շուրջ 8 մլն եվրո, ըստ Transfermarkt-ի: Համեմատության համար նշենք, որ «Ֆոլա-Էշի» դեպքում այս թիվը չէր գերազանցում 2 մլն եվրոն: Ըստ Transfermarkt-ի, Հայաստանի չեմպիոնի ֆուտբոլիստների տրանսֆերային հանրագումարը կազմում է 6 մլն եվրո:
Ահեղ մրցակից՝ որակավորման փլեյ-օֆֆում
«Արարատ-Արմենիա»-«Ցելյե» դիմակայության հաղթողը որակավորման փլեյ-օֆֆում կմրցի սերբական «Ցրվենա Զվեզդայի» հետ: Ի դեպ, սերբական հեղինակավոր թիմին ՉԼ մրցաշարից դուրս է թողել որակավորման առաջին փուլում «Արարատ-Արմենիային» պայքարից դուրս թողած Կիպրոսի չեմպիոն «Օմոնիան»: Մինչ դա, Կիպրոսի թիմը հաղթել էր լեհական «Լեգիային» (2:0 հիմնական ժամանակում): Դեռ վաղ է խոսել Սերբիայի չեմպիոնից, քանի որ այս պահին պետք է մտածել «Ցելյեի» արգելքը հաղթահարելու մասին, իսկ Սլովենիայի չեմպիոնն, ինչքան էլ որ տպավորում է ընթացիկ մրցաշրջանում, ամենևին էլ անանցանելի մրցակից չէ «Արարատ-Արմենիայի» համար: Նախորդ խաղում թույլ տված վրիպումները չկրկնելու և ավելի զգոն լինելու դեպքում մեր թիմը լուրջ խնդիրներ կարող է ստեղծել մրցակցի համար և կրկնել նախորդ տարվա հաջողությունը՝ դուրս գալ Եվրոպա լիգայի որակավորման փլեյ-օֆֆ:
Երվանդ ՀԱԿՈԲՅԱՆ
«Զինապահ» հիմնադրամը 2025 թվականի ավարտի դրությամբ հատուցումներ է տրամադրել 5 հազար 510 շահառուի
ԱԹՍ-ների զանգվածային հարձակում Ռուսաստանում․ կրկին հարվածել են Մոսկվայի նավթավերամշակման գործարանին
Աշխատող ծնողների համար սահմանվում է «ծնողական ժամ»
Փրկարարները և ոստիկանները Փամբակ գետում շարունակում են որոնողական աշխատանքները
Հայ դպրոցականների հերթական հաջողությունը
Ինչպիսի եղանակ է սպասվում այսօր
Ցեմենտի ներմուծումը 6 ամսով կսահմանափակվի
Մոսկվայի բոլոր օդանավակայանները կրկին դադարեցրել են աշխատանքը
Գիտնականները 550 տարի անց բացահայտել են Բոտիչելլիի մուսայի մահվան գաղտնիքը
77 գլխատված մարդկանց գաղտնիքը․ հնագետները վերանայել են հին Եվրոպայի ամենասարսափելի բացահայտումներից ...