Պարտվել, պարտվել այնպես, որ մրցակիցը հեչ չտանջվի

Մեկնարկեց ֆուտբոլի Ազգերի լիգայի գավաթը նաեւ Հայաստանի հավաքականի համար: Հայաստանի ազգային թիմը, առանց Հենրիխ Մխիթարյանի մեկնեց Հյուսիսային Մակեդոնիա եւ պարտվեց 2:1 հաշվով:

Ընդ որում, մակեդոնացիները ոչինչ չարեցին հաղթելու համար: Ոչ մի ջանք, ոչ մի եռանդ նրանց կողմից: Ամեն ինչ արեց Հայաստանի հավաքականը:

Հենց հանդիպման ամենասկզբում Հարոյանը տուգանային հրապարակում հարվածեց մրցակցին, ընդ որում, դրա կարիքը բոլորովին չկար եւ բոսնիացի մրցավարը նշանակեց 11 մետրոնոց հարված: Հետո արդեն Համբարձումյանը առանց անհրաժեշտության վայր գցեց մրցակցին եւ կրկին 11 մետրանոց: 2:0:

Միայն, երբ արդեն հանդիպման վերջին վայրկյանն էր, արդեն 11 մետրոնոց նշանակվեց մրցակցի դարպասին եւ այն իրացրեց Բարսեղյանը: Արդեն կարելի էր գրավել մրցակցի դարպասը, արդեն նրանց ոչինչ չէր կարող սպառնալ:

Տխուր խաղ, բացասական հույզեր, իսկ Հայաստանի հավաքականը պարտվեց մի թիմի, որը ոչ թե թույլ էր, այլ շատ թույլ, թույլիկ: Ընդամենը մեկ փաստ. Հայաստանի հավաքականը ստացել է անկյունայինի 13 հարված, իսկ մրցակիցը մեկ: Նորից ստիպված ենք կրկնել՝ այսպես ֆուտբոլ չեն խաղում:

Top-News.am