Ադրբեջանը սահմանին զորավարժություն է անցկացնում՝ տանկերի և օդուժի ներգրավմամբ

Ադրբեջանը նույնիսկ համատարած վարակի պայմաններում է շարունակում «մուսկուլներով խաղալ», Facebook-ի իր էջում գրել է Ալեն Ղուլյանը։

«Նրանց զինված ուժերն առաջնագծին մոտ տեղակայված զորավարժարաններում արդեն 3-4 օր է զորավարժություններ են անցկացնում։ Եթե սկզբից դիպուկահարների վարժանքներ են անցկացրել, հիմա արդեն հրետանի, տանկեր և ավիացիա են կիրառում։

Ադրբեջանի ՊՆ մամուլի ծառայության կողմից տարածված հաղորդագրություններից պարզվել է, որ երեկ վարժանքներ են անցկացրել Տ-90 տանկերով, Դ-20, Դ-30 և «Գիացինտ-Բ» քարշակվող հաուբիցներով։ Բացի այդ, երեկ կիրառել են նաև ռազմական ավիացիա (ըստ կադրերի` երկուական «Սու-25» գրոհիչներ և «ՄիԳ-29» կործանիչներ)։

Ադրբեջանցի ռազմական լրագրողները և առաջնագծին մոտ ապրող օգտատերերը գրում են, որ ինքնաթիռները թռիչքներ են կատարել նաև առաջնագծին մոտ հատվածում։ Ըստ նրանց` թռիչքներն իրականացվել են Թարթարի շրջանից մինչև Ֆիզուլու շրջան (Մարտակերտի, Մարտունու և Հադրութի շրջանների ուղղություն)։

Քիչ առաջ ադրբեջանական տիրույթում տեղեկություն է հրապարակվել, որ այսօր մարտական կրակով զորավարժություններ են անցկացվել նաև «Սմերչ» համազարկային կրակի ռեակտիվ համակարգերով», - գրել է Ղուլյանը:

Տեղեկության իսկությունը hraparak.am-ը փորձել է ճշտել Պաշտպանության բանակի հրամանատարի մամուլի քարտուղար Սենոր Հասրաթյանից։ Մեզ հետ զրույցում Հասրաթյանն ասաց․

«Ադրբեջանական կողմը, ինչպես մենք, պարբերաբար նախապատրաստության շրջանակներում կազմակերպում են ուսումնամարզական պարապմունքներ, ես այդքանը կարող եմ ասել»։

Բայց «Սմերչ» օգտագործվե՞լ է իրենց կողմից՝ հարցրինք․ «Ես նման տեղեկություն չունեմ»,- ասաց Հասրաթյանը։